Fortifikashon di siguridat di eksistensia i di merkado laboral ta prioridat di minister Schouten

Minister Schouten e siman aki a bishitá Hulanda Karibense. Meta mas prinsipal tabata pa sera konosí mas di aserka ku Saba, Sint Eustatius i Boneiru. Pero tambe e minister a anunsiá diferente medida dirigí riba siguridat di eksistensia, ku e ta bai traha riba dje di inmediato.

Carola Schouten - Viceminister-president en minister voor Armoedebeleid, Participatie en Pensioenen

Posibilidat di partisipashon pa tur hende riba merkado laboral i aserkamentu di pobresa tabata tópiko di kombersashon durante bishita di minister Carola Schouten (Maneho di Pobresa, Partisipashon i Penshun) na Hulanda Karibense. Di aserka el a mira i tende kon hopi hende riba e islanan ta konfrontá retonan finansiero. E minister a anunsiá ku di su banda e ta dispuesto pa tuma e pasonan nesesario pa loke ta trata e parti di entrada, pa realisá e norma pa mínimo sosial den 2025. El a añadí akshon di inmediato na su palabra na momentu ku el a anunsiá ku ta bai oumentá e ònderstant pa persona ku ta biba independiente riba su mes i pa es ku tin derecho riba ònderstant ku ta biba konhunto, i tambe e kompensashon pa yu (kinderbijslag).

Minister Schouten: “E kantidat di persona ku ta biba den pobresa ta alarmantemente haltu i nos tur huntu mester hasi algu na esei. Mi ta bai kombersá ku e Entidatnan Públiko i partnernan sosial tokante oumentu di e suèldu mínimo legal. Antisipando riba e kombersashonnan ei mi ta bai tuma e paso ku mi por tuma den mi funshon: oumentá algun benefisio sosial pa hisa siguridat di eksistensia. Ta importante pa riba término kòrtiku e hendenan eksperensiá un tiki alivio den nan pòtmòni.”

Entrante promé di yüli di e aña akí soltero ku ta biba independiente riba su mes ta risibí un oumentu di $78 pa luna na Boneiru, na Sint Eustatius $95 pa luna i $93 pa luna na Saba. Ademas, si dos persona ta biba huntu independiente riba nan mes, ta oumentá e ònderstant riba dje ku $86 pa luna na Boneiru, na Sint Eustatius ku $106 pa luna i na Saba ku $104 pa luna. Pareha ta risibí un oumentu e ora ei di total $164 pa luna na Boneiru, $201 pa luna na Sint Eustatius i $197 pa luna na Saba.

Ta oumentá e kompensashon pa yu (kinderbijslag) entrante promé di yüli ku $ 10,- pa yu pa luna. Entrante yanüari 2023 ta bin $ 10,- mas aserka. Anteriormente a anunsiá e kompensashon pa yu dòbel pa mayor di mucha ku tin nesesidat di kuido intensivo. Pa motibu ku ta realisá e areglo aki entrante yüli 2023 numa, e mayornan konserní por bini na remarke pa un kompensashon e aña akí mes.

Modernisashon di siguridat sosial i fortifikashon di merkado laboral

Ademas minister Schouten ta analisá modernisashon di e sistema di siguridat sosial. “Na e momentu akí no tin un provishon di entrada stabil disponibel pa persona ku no tin trabou. Nos ta bai trese kambio den esei, introdusiendo un provishon di desempleo. E areglo aki ta tuma tempu, pero ta hasi esfuerso pa regla esaki durante di e periodo di gabinete akí.” 

Durante e bishita a papia hopi tambe tokante partisipashon amplio riba merkado laboral. Pa duna tur hende un oportunidat real, tambe esun ku tin mester di sosten adishonal, ta bin un proyekto piloto na Sint Eustatius pa un promé tayer sosial i pa un di dos tayer sosial na Saba. Tambe Minister Schouten ta bai reservá adishonalmente i strukturalmente 1 mion Euro pa aña, pa fortifiká e merkado laboral riba tur tres isla. Ta bai usa e plaka adishonal akí pa guia di trabou-pa-trabou, entrenamentu i pa guia laboral di hóben i persona ku ta alehá di e merkado laboral. E detayenan eksakto lo diskutí mas den ekstenso ku e islanan riba término kòrtiku.