ZJCN, SMMC, SEHCF i Saba Cares ta uni forsa durante seminario "Baimentu afó pa tratamentu médiko" na Sint Eustatius

Notisia | 18-05-2022 | 22:06

Último tempu tin hopi atenshon pa e dunamentu di kuido na Islariba. Ta evidente ku organisashon di kuido di salú na Islariba ta un reto, pa motibu ku no por brinda kuido di segundo liña riba e isla i pashènt ta dependé di e traslado médiko. Traslado médiko pa asegurado na Saba i Sint Eustatius ta trese retonan logístiko, organisatorio i komunikativo kuné ku tin bia ta tuma hopi tempu i ta kompliká pa e pashènt. E partisipantenan di e seminario a para ketu na e retonan aki ku e meta pa mehorá e proseso di traslado médiko. Promé ku e seminario di 2 dia a kompilá informashon i punto problemátiko serka diferente institushon médiko, mandatario di entidat públiko Sint Eustatius i entidat públiko Saba i asegurado.

Algun konklushon importante di e seminario akí ta:

• Tantu di parti di ZJCN komo SMMC, SEHCF en Saba Cares mester komuniká mihó ku e aseguradonan. Mester bin mas kolaborashon riba e tereno akí entre e miembronan di e kadena pa mantené e asegurado bon informá.
• E ofisinanan di ZJCN mester  ta mas visibel i aksesibel riba e islanan. 
• E oferta di kuido na SMMC mester ta kla i tambe referensia pa SMMC mester bai sin problema. ZJCN i e ofresedónan di kuido na Saba i Sint Eustatius a palabrá ku riba término kòrtiku lo bai kuminsá ku un proyekto piloto pa hasi e referensianan pa SMMC mas fásil i transparente pa e aseguradonan.
• E protokòl pa evakuashon médiko mester ta kla i raspa pa tur persona embolbí i mester mehorá esaki mas skèrpi.
• Informashon tokante orario di atmishon pa tratamentu i/òf konsulta serka e diferente spesialistanan mester ta disponibel pa e aseguradonan. E orarionan di atmishon serka un kardiólogo por ehèmpel ta diferente ku e orario di atmishon serka e urólogo i mester informá e aseguradonan bon al respekto. Na e momento aki e informashon no ta disponibel.

ZJCN a organisá tambe enkuentro riba ámbos isla kaminda asegurado por a papia ku e funshonario di keho. ZJCN den futuro serkano lo krea mas oportunidat pa e asegurado por komuniká su keho fásil. Durante di e seminario a palabrá tambe ku e funshonario di keho di SEHCF, Saba Cares, SMMC i ZJCN ta bai aserká otro mas i traha huntu  na momentu di atendé ku keho. Algun asegurado tabata invitá pa kompartí eksperensia ku e partisipantenan di e seminario. E eksperensianan aki a yuda e partisipantenan haña un mihó bista di e mehorashonnan ku ta nesesario pa e proseso di traslado médiko pa habitante di Saba i Sint Eustatius por kana mas mihó.