Investigashon duna pèrmit, supervishon i mantenshon (VTH) na Hulanda Karibense

Sekretario di Estado di Infrastruktura i Maneho di Awa a pidi Inspectie Leefomgeving en Transport (ILT, inspekshon di ambiente di biba i transporte) na òktober 2022 pa ehekutá un investigashon i hasi rekomendashon pa un sistema pa duna pèrmit, mantenshon i supervishon (VTH) ku ta funshoná bon na Boneiru, Sint Eustatius i Saba.

Vergunningverlening, toezicht  en handhaving (VTH) in Caribisch Nederland

Un tim di proyekto di ILT i LVN (Agrikultura, Naturalesa i Kalidat di Kuminda) ta ehekutá e investigashon. Fin di novèmber i medio yanüari e tim di proyekto ta bini Boneiru pa kòmbersashon i investigashon di fail. Gezaghèber di Boneiru tambe a pidi Sekretario di Estado pa hasi uso di ekspertisio di ILT pa komplementá trayekto di mehorashon denter di  Entidat Públiko Boneiru (OLB) ku ya a kuminsá. Na febrüari i mart 2023 e tim ta bishitá Sint Eustatius i Saba.

Lo duna un bista di e situashon durante e periodo 2020 te ku 2022 i lo antisipá riba legislashon ku ta drenta na vigor otro aña. E legislashon tokante konstrukshon i medioambiente (Wet Vrom BES, Lei di bibienda públiko, planifikashon urbano i maneho di medioambiente BES) i e lei pa protekshon di naturalesa (Wet grondslagen natuurbeheer- en bescherming, Lei di base di mantenshon di naturalesa i protekshon) ta forma e kuadro di evaluashon di e investigashonnan aki.

E tim ta duna un bista di kiko ta bai bon, kiko ta bai ménos bon i kiko posiblemente ta nesesario pa kumpli ku e legislashon nobo. Lo inkluí e konklushonnan i rekomendashonnan ku ta surgi for di esaki den un rapòrt ku lo ofresé na Sekretario di Estado, Kolegio Ehekutivo, Komisario di Gobièrnu Sentral i Konseho Insular.