Resultado di investigashon di persepshon di klientenan di e unidat SZW di RCN
Dunamentu di bon servisio na Boneiru, Saba en Sint Eustatius ta prioridat pa SZW. Den e promé mitar di e aña akí, ofisina di investigashon Linkels & Partners, riba enkargo di e unidat SZW di RCN, a hasi un investigashon pa saka afó kon siudadanonan ta eksperensiá e dunamentu di servisio. E investigashon ta brinda hopi punto di referensia pa mehorá e servisio.
Unidat di SZW di RCN ta enfoká riba situashon laboral sigur, saludabel i hustu i ta hasi pago di seguronan sosial na nòmber di e ministerio, pa kontribuí na siguridat di eksistensia pa grandi-, mayor- i personanan ku temporalmente no por traha òf ta den un emergensia finansiero. E servisio ta kontinuamente den desaroyo. Por ehèmpel for di 2020 e unidat di SZW di RCN a implementá e pakete di ayudo di emergensia di Corona, den 2021 a digitalisá e proseso di notifikashon di malesa i aplikashon pa pèrdida di suèldu i resientemente a kuminsá ku ehekushon di e areglo temporal pa mayornan ku yu ku tin mester di kuido intensivo. SZW gustosamente kier sa di su klientenan kon nan ta eksperensiá su servisio, p’esei e ofisina di investigashon Linkels & Partners a tene un investigashon kualitativo di persepshon di kliente pa loke ta trata e organisashon na Boneiru, Sint Eustatius i Saba.
For di e investigashon ta resultá puntonan di atenshon importante i asuntunan ku por mihó i ku mester mehora. Por ehèmpel por mehora aksesibilidat via telefòn i e-mail i klientenan, pa motibu di e situashon di alohamentu, no tur ora ta sinti nan mes sigur pa papia libremente tokante asuntunan personal. Tambe tin kliente ku ta ferwagt mas komprenshon serka e kolaboradónan i ta haña fastioso ku nan tin ku bolbe konta nan storia na un otro kolaboradó. Un konklushon di e investigadónan ta tambe, ku di parti di klientenan no a bin señalnan ku ta mustra riba defisiensia hopi grave òf práktikanan inapropiá di parti di e unidat.
Pa loke ta trata eksperensia di kliente na momentu di ehekushon di instrumèntnan spesífiko, e unidat ta skor bon pa loke ta trata asuntunan ku tin di aber ku labor. Personanan ku ta risibí penshun di behes riba e islanan tambe por lo general ta positivo tokante e servisio ku nan ta eksperensiá. Tokante servisio riba tereno di ònderstant i pèrdida di suèldu e klientenan ta mas krítiko.
Kontinuashon
Lo diskutí resultadonan di e investigashon ampliamente ku e kolaboradónan durante dianan di tim den desèmber. A base di esaki tambe ta formulá un plan di akshon i mehorashon konkreto, kaminda ta tene kuenta ku loke ta realisabel riba término kòrtiku i término mas largu. Resientemente un funshonario di keho a kuminsá traha na e unidat di SZW di RCN. Banda di esei algun kolaboradó a kuminsá ku un treinen di atenshon pa kliente, e aña benidero otro kolaboradónan lo sigui.
Por wak e investigashon kompletu (na hulandes) aki. Klientenan ku tin pregunta basá riba e investigashon òf tokante e servisio di SZW, por manda e-mail pa info.szw@rijksdienstcn.com.