Gabinete ta fortalesé komunidat digital den parti Karibense di Reino
E mandatario koordinadó Van Huffelen (Relashonnan den Reino i Digitalisashon) awe ta presentá un agènda di trabou pa un komunidat digital inklusivo, sigur i prometedor.
Den e promé agènda di trabou, gabinete a elaborá i spesifiká e temanan ‘fundamentu digital’ i ‘gobièrnu digital’ ku a sali for di e karta di liña prinsipal di 8 di mart último. Ku esei a pone e promé paso pa elaborashon konkreto di ambishon di gabinete pa e transishon digital di Reino Hulandes.
“Siudadano i empresa na Hulanda Karibense mester por partisipá di manera ekivalente den komunidat digital. Esei hopi biaha no ta e kaso ainda”, segun van Huffelen. “E servisio di gobièrnu no ta ekipá di forma optimal ainda i e gobièrnu digital tambe ainda ta den su infansia. Nos ta bai traha riba esaki pa trese avanse. Nos ta bai hiba e servisio na un nivel ekivalente ku esun di Hulanda Oropeo, tantu digital komo físiko. Ademas nos lo drenta den kombersashon ku e paisnan independiente dentro di Reino pa determiná kiko nos por hasi pa fortalesé e transishon pa un komunidat digital na Aruba, Kòrsou i Sint Maarten”.
Den e agènda di trabou tin shete punto di akshon pa Hulanda Karibense:
- E desaroyo kontinuo di un sistema di identidat i akseso. Studiante for di Hulanda Karibense i e paisnan ta haña un BSN mas rápido na Hulanda Oropeo, i di tal forma ta fasilitá e proseso di petishon pa provishon;
- Ehekushon di e plan di akshon “Publieke dienstverlening Caribisch Nederland” físikamente i digital riba nivel ekivalente;
- Ehekushon di e plan di akshon pa oumentá disponibilidat i stabilidat di internèt, ademas di hasi esaki mas pagabel;
- Oumento di abilidat digital;
- Sòru pa tur hende por subi onlain di forma sigur i konfiabel;
- Elaborashon di un proposishon pa fondo di kresementu di kuarto ròndu;
- Determiná huntu ku e paisnan kon por sostené e transishon pa un Komunidat Digital.
Ambishonnan grandi
Gabinete ta mira mas aleu di su término di gobernashon i ku bista riba futuro pa 2030. E agènda di trabou pa e motibu ei tin ambishonnan grandi. Den e realisashon huntu ku tur partido enbolbí ta keda buska un balansa entre ambishon i faktibilidat, banda di e trabounan ku ya ta andando. Esaki ta bin bèk tambe den e aktualisashon anual, pa motibu ku digitalisashon ta rekerí atenshon permanente, fleksibilidat i adaptashon. A elaborá e agènda di trabou ku estrecho konsulta ku ko-gobièrnunan lokal i ta duna direkshon den e transishon digital i digitalisashon den e diferente domèinnan di maneho den Reino.