Miónes pa infrastruktura kultural pa e parti Karibense di Reino
E añanan binidero lo invertí miónes di euro èkstra den biblioteka i herensia den parti Karibense di Reino. Esaki ta pará den e karta di mas aña di Kultura den kua sekretario di estado Uslu (Kultura i Media) ta amplia riba su punto di salida pa maneho di kultura e añanan binidero. E sekretario di estado ta invertí fuertemente den infrastruktura kultural di Aruba, Boneiru, Kòrsou, Sint Eustatius, Saba i Sint Maarten.
Sekretario di estado Uslu: ‘Kultura ta fundeshi i semènt di nos sosiedat. I un biblioteka ta e lugá unda mucha, hóben i adulto ta bini den kontakto ku kultura, ku storia i ku otro. Ta p’esei tin sèn adishonal disponibel pa e bibliotekanan físiko na Boneiru, Sint Eustatius i Saba. Tambe nos ta invertí den herensia i archivo. Pa motibu ku esei ta nos historia ku nos ta kompartí i mester kuida esaki bon. Netamente pa motibu ku e historia aki tin biaha por ta tenso i kompliká.’
Bibliotekanan
E añanan benidero Uslu lo invertí fuertemente den biblioteka públiko na Hulanda Karibense. Ku e sèn aki e ke sòru pa fasilidat bibliotekario dirigí riba futuro pa e islanan Boneiru, Sint Eustatius i Saba. Esei lo nifiká ku lo sera entre otro e diskrepansia den e ret di biblioteka físiko. Pa mehorá e ret di biblioteka a pone 1 mion euro disponibel e aña aki i pa 2023 i 2024 2 mion anualmente.
Bibliotekanan ònlain
Un biblioteka ònlain ku ta fásil pa e kliente usa ta un parti lógiko i importante pa un biblioteka. E biblioteka ònlain a konosé un kresementu enorme den periodo di corona i sekretario di estado Uslu ke sigui konstruí riba esaki. P’esei un infrastruktura nashonal inovativo ta nesesario, i e lo traha riba esaki huntu ku Biblioteka Real i otro partnernan. Pa esaki a pone 5 mion disponibel anualmente pa henter Reino i na 2023 i 2024 un suma adishonal di 8 mion pa e infrastruktura digital. E biblioteka ònlain ta disponibel tambe pa e parti Karibense di Reino.
Herensia
Ta importante pa traspasá pasado pa generashon mas hóben i pa ta konsiente di e hopi i diferente storianan tokante di nos pasado. Ku esei tin atenshon spesial pa e parti Karibense di Reino. E introdukshon di un museo di sklabitut nashonal ta kontribuí na konosementu i konsientisashon di e historia di sklabitut. A asigná algun ‘kwartiermaker’ pa desaroyá e plannan i ku esaki lo tene kuenta ku nifikashon di e museo pa e parti Karibense di Reino.
Pa konservashon di monumento na Hulanda Karibense a pone 10 mion adishonal disponibel den forma di fiansa ku interes abou. Tambe ta traha riba mehorashon di atministrashon i disponibilidat digital di archivo den parti Karibense di Reino.
Fondo Kultural di Reino
Kasi tur programa i areglo di Fondo kultural di Reino ta habrí pa parti Karibense di Reino, meskos ku sèn for di e Fondo pa Partisipashon Kultural pa kultura di hubentut. Esei ta nifiká ku abitante di parti Karibense di Reino tambe por hasi uzo di e supsidionan aki. Fondo kultural di Reino ta traha pa ta mas fásil pa haña i mihó aksesibel. Por ehèmpel, aktualmente ta realisá un proyekto piloto unda un fondo tin su mesun persona di kontakto stashoná na e parti Karibense di Reino.