Kontinuashon bishita di DUO na islanan Karibense

Den luna di novèmber “Dienst Uitvoering Onderwijs” (DUO) ta hasi un bishita atrobe na Aruba, Boneiru, Kòrsou i Sint Maarten. DUO ta habri un ofisina di servisio temporal riba e islanan aki pa por papia ku futuro studiante i studiante bieu. Banda di esei DUO ta organisá tambe reunion informativo i alabes ta ofresé mesora yudansa na midí pa problema di pago. Esaki ta un kontinuashon di e bishitanan eksitoso di DUO na e islanan Karibense fin di aña pasa i kuminsamentu di e aña aki.

DUO - Bezoek de Antillen

Reunion informativo

E reunionnan informativo ta dirigí riba studiante ku ta bai studia na Hulanda i nan mayornan. Durante di e reunionnan nan ta haña tur informashon tokante di finansiamentu di estudio i otro asuntu ku nan mester regla na Hulanda.Tambe tin reunion informativo pa studiante bieu. Den e reunionnan aki ta duna informashon di e posibilidat pa pidi pa midi kapasidat finansiero, hasi pago bèk lokalmente i kiko por hasi ora tin problema pa pago.

Ofisina di servisio temporal

Na e ofisinanan di servisio temporal hende por pasa ku tur pregunta tokante finansiamentu di estudio na Hulanda i e pago bèk di nan debe di estudio. Tambe e trahadónan por yuda ku yenamentu di formulario òf si un hende no tin akseso mas na “Mijn DUO”.

Pa un bishita na un ofisina di servisio no tin mester di traha un sita.

Pero sí e studiante bieu mester trese su identifikashon. I si nan ke pidi un redukshon riba nan pago mensual, nan mester trese tambe un resúmen di nan entrada. Di e manera ei DUO por yuda e grupo aki si ta posibel mesora.

Yudansa kustumbrá

Ku plaser DUO ke yuda pa prevení ku studiante bieu ta kai den problema finansiero. P’esei un parti di e studiantenan bieu ku un retraso den pago ta haña un invitashon di DUO pa papia ku un trahadó pa yega na un solushon pa un areglo di pago.

Informashon online na Saba i Sint Eustatius

Pa Saba i Sint Eustatius DUO ta ofresé informashon online. Tin un webinar pa futuro studiante i un webinar pa pagadó. I den kaso ku tin pregunta di studiante (bieu) di e islanan aki, por tuma kontakto ku DUO pa medio di chat òf yamada di vidio.

Mas informashon

DUO ta na Sint Maarten for di 31 di òktober te ku 4 di novèmber, di 7 te ku 18 di novèmber na Aruba, di 14 te ku 18 di novèmber na Boneiru i di 21 novèmber te ku 9 di desèmber na Kòrsou. Por haña mas informashon tokante di e ofisinanan di servisio temporal, e reunionnan informativo i e webinarnan riba e wèpsait di duo.nl/bezoekantillen.