Aña Konmemorativo Pasado di Sklabitut: mas atenshon i rekonosementu struktural pa nos pasado kompartí
Notisia | 14-10-2022 | 00:00
Pasado di sklabitut ta un parti di nos historia kompartí hopi doloroso, importante i ku te ku resientemente no a haña sufisiente atenshon. Entrante otro aña, di 1 di yüli 2023 te 1 di yüli 2024, lo duna atenshon speshal na esaki den henter Reino durante e Aña Konmemorativo Pasado di Sklabitut.
Mas di 300 aña largu, hopi bia di parti di trafikante di katibu hulandes tambe, a sekuestrá i transportá adulto i mucha for di partinan di Afrika bou di sirkunstansia inhumano ku barku a traves di Oséano Atlántiko pa e eks kolonianan hulandes: Sürnam i e islanan karibense Aruba, Boneiru, Kòrsou, Saba, Sint Eustatius i Sint Maarten. No tabata tene konsiderashon tampoko ku e habitantenan original di e diferente kolonianan hulandes. Na Asia tabata bende esun sklavisá ku teritorionan ku tabata bou di dominio di ‘Vereenigde Oostindische Compagnie’ (VOC). Generashonnan largu hende tabata nase den sklabitut. Tabata oblig’é henter su bida largu pa traha komo katibu na disposishon di e doñonan hulandes di plantashi.
Riba promé di yüli 1863 a abolí sklabitut pa lei na Sürnam i e islanan karibense, e tempu ei kolonia di Reino hulandes. Tòg un gran parti di e katibunan mester a keda traha 10 aña largu ainda riba e plantashinan bou di supervishon di estado, pa limitá e ‘daño di e medida akí’ pa e doñonan di plantashi. Pa e motibu ei pa hopi hende den Reino di e tempu ei, sklabitut a yega na un fin na 1873 numa. Riba promé di yüli 2023 esei ta 150 aña pasá.
Desde 1858 te hopi despues di 1873 tabata laga hopi hende di Asia traha trabou pisá riba kontrato laboral na Sürnam bou di e gobièrnu kolonial hulandes.
Durante e Aña Konmemorativo Reino hulandes ta reflekshoná riba e historia doloroso akí. I kon e historia akí te ku dia di awe ainda ta hunga un papel negativo den bida di hende. Gobièrnu di Reino ta sostené inisiativa di òf den kolaborashon ku diferente grupo i sosiedat ku tin relashon ku pasado di sklabitut. Di e forma aki e Aña Konmemorativo Pasado di Sklabitut ta bira un aña di e komunidat mes.
E areglonan di supsidio
Na yüni i yüli 2023 ta hasi apertura grandioso di e aña den henter Reino, i na yüli 2024 tin klousura di e Aña Konmemorativo. Ku e aña konmemorativo akí Gobièrnu di Reino ta spera di aportá na oumento permanente di konosementu i laso den komunidat.
Ademas gabinete ta pone 2 mion euro disponibel pa organisashon sosial i instansia kultural organisá por ehèmpel aktividat durante e Aña Konmemorativo. Ku e plaka akí tantu instansia grandi komo inisiativa chikitu òf individuo lokal por pidi plaka pa organisá aktividat sosial i/òf kultural. Ehekushon ta den man di dos fondo kultural: Mondriaan Fonds i Fonds voor Cultuurparticipatie.
Inisiadónan, manera museo, teatro i archivo, pero tambe inisiadó privá manera artista, kreadó òf organisadó kreativo, por entregá un petishon pa haña finansiamentu pa organisá un aktividat durante e Aña Konmemorativo. Mondriaan Fonds i Fonds voor Cultuurparticipatie ta evaluá e petishonnan independientemente, pa medio di un komishon di evaluashon representativo. Tur hende den Reino ku kier organisá un aktividat den e Aña Konmemorativo por hasi un petishon. Por haña informashon tokante esaki riba e wèpsait di Mondriaan Fonds i Fonds voor Cultuurparticipatie.
Durante e aña konmemorativo den henter Reino nos ta duna atenshon na pasado di sklabitut. Esaki ta sosodé 150 aña despues ku realmente a abolí sklabitut den e eks kolonianan hulandes na 1873. Na e momentu ei e periodo di 10 aña di supervishon di estado, ku a instituí despues ku a abolí sklabitut ofishalmente na 1863, a vense. Desde 1858 te hopi despues di 1873 tabata laga hendenan di Asia hasi trabou pisá pa medio di e sistema di trabou fòrsá na Sürnam bou di gobièrnu kolonial hulandes, ku hopi bia tabata kontené patronchi di sklabitut ainda.
E pasado di sklabitut ta un parti di nos historia komo Reino hopi doloroso i ku te ku resientemente no a haña sufisiente atenshon. Ta un pasado ku a forma e komunidat manera nos konosé awendia i pa e motibu ei e ta un historia di nos tur. E ta un pasado ku ainda tin su influensia, tin su efekto te ku dia di awe kaminda persona den su bida diario awendia ainda ta sufri por ehèmpel den forma di diskriminashon i rasismo. Pa e motibu ei ta sinti nesesidat pa rekonosé e pasado akí. Gobièrnu Sentral, ku e aña konmemorativo akí, ta spera di aportá na oumentu permanente di konosementu i di lasonan den komunidat.
E aña konmemorativo ta dirigí riba henter komunidat den Reino kompleto.
For di 1 di yüli 2023 te ku 1 di yüli 2024 nos ta duna atenshon un aña largu na 150 aña di abolishon di sklabitut den Reino. Di parti di Gobièrnu Sentral ta fasilitá apertura di e aña ku atenshon pa konmemorashon i kontenido di e programashon i un evento ku ta marka final di e Aña Konmemorativo. Ademas Gobièrnu Sentral ta pone 2 mion euro disponibel pa medio di dos fondo di kultura di Reino pa fasilitá aktividat kultural, sosial i edukativo ku ta sali for di komunidat. Sentral ta pará perspektiva di diferente grupo i sosiedat ku ta forma parti di e pasado ku te ku awor no a haña sufisiente atenshon, ku kier konmemorá despues sklabitut den e eks Reino hulandes i e periodo di trabou fòrsá.
Ounke ku Gobièrnu Sentral ta komprondé ku pa hopi hende den nos komunidat e Aña Konmemorativo ta parti di un gritu mas amplio pa rekonosementu, e organisashon di e Aña Konmemorativo ta apart di eventual konsiderashon pa apuntá 1 di yüli komo dia di fiesta nashonal. Gabinete lo inkluí e tópiko akí den e reakshon di gabinete riba e rapòrt di e grupo di diálogo. En general t’asina ku no ta na gabinete pa stipulá si hulandesnan ta liber riba dianan di fiesta nashonal tambe, ya ku ta den den kontratonan kolektivo i/òf kontratonan laboral ta stipulá esei.
1 di yüli 2023 ta un fecha hopi importante, simbóliko i konosí relashoná ku pasado di sklabitut. Riba 1 di yüli 1863 a abolí sklabitut ofishalmente den e anterior kolonianan. Ta e fecha tambe riba kua e Konmemorashon Nashonal Pasado di Sklabitut ta tuma lugá.
E punto di salida di e Aña Konmemorativo ta e pasado di sklabitut transatlántiko di Sürnam i e islanan karibense Aruba, Boneiru, Kòrsou, Saba, Sint Eustatius i Sint Maarten.
Por papia di sklabitut na otro parti tambe di Reino Hulandes. Eksplísitamente nos ta duna tambe espasio durante e aña konmemorativo na perspektiva ku un relashon ku e pasado di sklabitut hulandes ku te ku awor no a haña sufisiente atenshon.
E perspektivanan, pero únikamente esakinan so, ta: e perspektiva di e poblashon original ku a ser sklabisá na Sürnam, e perspektiva di sklabitut den Ost (òf anterior India Hulandes) i e perspektiva di labor fòrsá di partikularmente chines-, javano- i hindustannan na Sürnam komo tambe por ehèmpel komunidatnan moluko, ganes i surafrikano.
E pasado di sklabitut ta un parti hopi doloroso i importante di nos historia. Den e pasado di sklabitut no a duna sufisiente atenshon na e perspektivanan di komunidatnan embolbí i nan desendientenan. Ta usa e terminologia ‘kompartí’ pa indiká ku e perspektivanan akí ku no a haña sufisiente atenshon mester forma parti di nos pasado kompartí. Gobièrnu Sentral ku esaki ta trata na kontribuí na atenshon struktural, konosementu permanente i rekonosementu pa nos pasado kompartí i su impakto den presente.
Mondriaan Fonds i Fonds voor Cultuurparticipatie kada un ta traha un areglo di supsidio pa e Aña Konmemorativo pa petishonarionan di henter Reino, inkluso e islanan karibense Aruba, Boneiru, Kòrsou, Saba, Sint Eustatius i Sint Maarten. Pa medio di e dos areglonan akí un diversidat grandi di organisashon (kultural), komunidat, archivo i individuo por desaroyá aktividatnan ku kua por konmemorá sklabitut i por amplia konosementu tokante e pasado di sklabitut.
Pa motibu di e diferensia den forma di traha di e fondonan esaki ta sòru pa e areglonan ta aksesibel fásilmente. Pa medio di e dos areglonan akí por fasilitá diferente tipo di petishon di tantu instansia grandi komo inisiativa chikitu lokal i di tantu komunidat komo individuo i organisashon kultural.
Gabinete den kabamentu di e aña aki mes ta bin ku un reakshon riba e rapòrt di konseho di e Grupo di Diálogo.
Koutela ta para sentral den esei. P’esei Promé Minister, minister di Komersio Eksterior i minister i sekretario di estado di Asuntunan Interno tabata di bishita último tempu na Sürnam i e parti karibense di Reino. E reakshon di gabinete lo amplia tambe riba e rekomendashon di e Grupo di Diálogo, nan a rekomendá pa pidi diskulpa i tuma medidanan di rehabilitashon.
