Pakete ambisioso di medida pa oumentá éksito di estudio di studiante Karibense
Durante e konferensia di trabou “Éksito di estudio di studiante Karibense”, ku a tuma lugá siman pasá na universidat di Aruba, a bini ku un pakete ambisioso di medida konkreto i struktural pa oumentá éksito di estudio di e studiante Karibense. Ta presentá e resultadonan di e konferensia bou di e nòmber nobo 'Aliansa Stratégiko pa Edukashon (SEA)' na e siguiente ministeriele Vierlandenoverleg Onderwijs, Cultuur en Wetenschap (Konsulta Ministerial di kuater pais tokante Edukashon, Kultura i Siensa).
SEA ta formá pa representante di pais Aruba, Hulanda Karibense (Boneiru, Saba, Sint Eustatius), Kòrsou, Sint Maarten i Hulanda i e partidonan di edukashon di e paisnan aki. Nan tin un aña i mei ta traha kaba pa mehorá éksito di estudio di e studiantenan Karibense. Un gran parti di e studiantenan aki no ta kompletá nan estudio den eksterior. A organisá e konferensia di trabou na Aruba pa desaroyá e próksimo pasonan konkreto.
Vários medida konkreto i struktural
E suptítulo di SEA ta ‘A bright future for Caribbean Students’, un futuro briante pa e studiantenan di Karibe. Pa hasi e futuro aki posibel, un plan stratégiko konhunto ta nesesario, ku ta fortalesé e infrastruktura edukativo pa edukashon mas haltu i sekundario den Karibe.
Ademas, un programa di mobilidat konhunto mester hasi mobilidat den Reino na nivel mbo, hbo i WO posibel, i SEA ke prepará e studiantenan na e islanan mihó pa nan eskoho di estudio. E parti último SEA ke hasi dor di ofresé un Pre-Academic Year (Aña Pre-Akadémiko), pero tambe dor di uso di medio moderno, manera èp i brel di VR. Tur e rekomendashonnan aki por topa bek den www.strategiceducationalliance.org.
Koperashon a largo plaso ta importante
Segun SEA, un aserkamentu struktural i mehorashon di éksito di estudio di e studiantenan Karibense ta rekerí un kompromiso i partisipashon di tur partido, ku lo dura algun aña. Ta p’esei SEA lo pidi na vierlandenoverleg pa diskutí i ratifiká e kompromiso multianual aki i eksistensia di SEA.
Tambe SEA lo pidi e ministernan involukrá di vierlandenoverleg Edukashon, Kultura i Siensia pa pèrkurá pa apoyo finansiero i rekurso i pa garantisá ku ta realisá e akuerdonan hasí.