Gabinete ta pone 15 mion euro disponibel pa gastu di energia mas abou na Hulanda Karibense

Gabinete ta tuma medida pa redusí preis di elektrisidat na Hulanda Karibense. Por ehèmpel, e gastunan fiho pa maneho di ret, awor aki promedio alrededor di 390 dòler, na 2023 ta bira sero (0). Ademas, gabinete ta paga mitar di e tarifa variabel pa elektrisidat ku ta pasa riba 0,38 dòler pa KWh. E medidanan aki ta konta pa tur hende: kas di famia, empresa mediano i chikí, i instituto di deporte i kultura na Boneiru, Sint Eustatius i Saba.

Duurzame elektriciteit

E medidanan, ku segun espektativa ta kosta 15 mion dòler, ta poné den un karta di minister pa Klima i Energia, Rob Jetten, ku awe e a manda pa Tweede Kamer. Na Hulanda Oropeo e sosten ta eksistí entrante promé di yanüari 2023 i ta konsistí di un ‘prijsplafond’ riba energia pa tur kas di famia i otro konsumidó chikitu.

Pa motibu ku no por apliká e medidanan aki na mes manera pa Hulanda Karibense, den konsulta ku gobièrnu i kompania di elektrisidat na e islanan, a skohe pa un otro areglo. Pa mantené e medidanan pa e islanan faktibel, a palabrá ku ta paga e kompania di elektrisidat e sèn pa e kuenta di elektrisidat. Den implementashon di e pakete pa Hulanda Karibense ta konsiderá si, meskos ku na Hulanda Oropeo, por tuma e promé medidanan entrante novèmber próksimo.

Sekretario di estado Van Huffelen ta kontentu ku e manera ku a skohe pa atendé esaki pa Hulanda Karibense.

“Tur hende ta sinti e oumento di gastu di elektrisidat den su pòtmòni. Gabinete ta purba yuda kaminda ta posibel, pa e motibu ei tin e areglo aki pa Hulanda Karibense. E manera di atendé aki ta duna klaridat na e hendenan.”

Anteriormente tabatin kaba un supsidio pa energia di 1300 dòler pa kas di famia ku entrada te 130 porshento di salario mínimo segun lei, i un bahada di akseins riba gasolin: 16 USD pa liter pa e promé mitar di 2023 i 8 USD pa liter pa e di dos mitar di 2023. Ademas, na òktober 2021 a pone un montante di 2 mion euro disponibel pa 2022 pa e oumento di preis di elektrisidat, ku kual e aña aki a redusí un parti konsiderabel di e gastunan fiho pa maneho di ret.

Pa mantené e energia na e islanan sostenibel, pagabel i konfiabel riba término largu, siman pasá gabinete a anunsiá ku e ta pone 33,6 mion euro disponibel pa un transishon aselerá pa elektrisidat sostenibel na Boneiru, Sint Eustatius i Saba. Esaki ta nifiká ku dentro di tres aña ta produsí un promedio di 80 porshento di e elektrisidat riba e tres islanan ku bientu i solo. Ademas di preis mas abou, esaki ta sòru tambe pa ménos dependensia di por ehèmpel krudo i hopi ménos emishon di nitrógeno.