Pasado di sklabitut sentral durante bishita di minister Bruins Slot i sekretario di estado Van Huffelen na parti Karibense di Reino
Hanke Bruins Slot, minister di Asuntunan Interno i Relashon di Reino (Binnenlandse Zaken en Koninkrijksrelaties BZK), i Alexandra van Huffelen, sekretario di estado di Relashon di Reino i Digitalisashon, ta bishitá konhuntamente Sint Maarten, Sint Eustatius i Kòrsou di 6 te 10 di sèptèmber. E bishitá ta relashoná ku e pasado di sklabitut, pa asina nan mes eksperensia, mira i tende for di kombersashonnan ki nifikashon e pasado di sklabitut tin pa e islanan i pa Hulanda.
Sint Maarten
E biahe ta kuminsá riba djamars 6 di sèptèmber na Sint Maarten, kaminda e dos mandatarionan lo kombersá ku habitantenan di diferente orígen, tokante e pasado di sklabitut i kiko e ta nifiká pa futuro. Tambe nan lo para ketu na 5 aña di orkan Irma.
Sint Eustatius
Riba 7 di sèptèmber e siguiente parada ta na Sint Eustatius. Aki tin entre otro un kaminata históriko den Oranjestad, un kombersashon ku Statia Heritage Commission i un bishita na un skol i kombersashon ku hóbennan tokante e pasado di sklabitut riba e programa.
Kòrsou
Na Kòrsou e mandatarionan lo bai den kombersashon ku hóbennan i ekspertonan riba e tereno di sklabitut. Tambe nan lo hiba un bishita na e ‘National Archaeological-Antropological Memory’ i Archivo Nashonal. Lo konkluí e biahe ku un reunion ku artistanan, eskritornan i musikante kaminda e tema sentral lo ta sklabitut
Grupo di Diálogo Pasado di Sklabitut
Riba enkargo di minister di BZK e Kolegio di Konseho, Grupo di Diálogo Pasado di Sklabitut, a duna un konseho riba e pregunta kon pa atendé ku e pasado di sklabitut i su impakto den presente. Gabinete lo bin ku un reakshon promé ku 2023 riba e konseho akí. Gabinete su meta ta un futuro kompartí, pa logra esei bo mester konosé bo pasado kompartí promé. Lo inkluí e eksperensianan durante e biahe akí tambe den e reakshon di gabinete.