Kuadro di Referensia i liña di siñansa Papiamentu ta kla pa drenta skol
Djaluna último a tuma lugá un konferensia organisá pa sentro nashonal di ekspertisio pa desaroyo di kuríkulo (nationaal expertisecentrum – SLO) en konekshon ku e Kuadro di Referensia i liñanan di siñansa pa papiamentu.
Durante di e konferensia tabata tin presentashon di diferente eksperto di enseñansa i lider di proyekto Mariette Hoogeveen. E partisipantenan tambe tabata tin oportunidat di práktika ku diferente tarea i hasi pregunta.
‘Meta di e Kuadro di Referensia i elaborashon di esaki den un liña di siñansa ta pa for di un perspektiva multilingual fortifiká posishon di papiamentu komo idioma materno i e idioma mas grandi ku ta dirigí direktamente riba mucha den i pafó di enseñansa na Boneiru. Pa e motibu akí a elaborá e Kuadro di Referensia den un liña di siñansa kontinuo pa e materia eskolar papiamentu. E liña di siñansa akí ta duna sugerensia pa edifikashon i strukturashon di e oferta di enseñansa di papiamentu pa e diferente nivelnan.’ segun lider di proyekto Hoogeveen
Diputado Nina den Heyer ta añadí: ‘Esaki ta un siguiente paso importante den direkshon di rekonosementu i mantenshon di papiamentu’, segun e diputado.’
Kuadro di referensia komo instrumento
Un kuadro di referensia ta un instrumento ku ta deskribí kiko alumnonan mester por i sa na sierto momentu den nan karera eskolar: na fin di enseñansa primario, na fin di vmbo, nan fin di havo-vwo i na fin di mbo. E ta deskribí kuater nivel di prestashon pa dominio di idioma, ku un difikultat ku kada bia ta oumentá. A desaroyá e Kuadro di Referensia i e liñanan di siñansa den kolaborashon ku un grupo di trabou di dosente di enseñansa primario i avansá na Boneiru, i ta resultado di e enkargo ku ministerio di Enseñansa, Kultura i Siensia (OCW) a duna na SLO na Hulanda.