Taskforce pa atendé ku puntonan di atenshon

Mihó servisio di parti di bankonan. Akseso mas fásil na un notario. Ta dos tópiko ku e ‘taskforce puntonan di atenshon Hulanda Karibense’ ta bai traha riba dje. Sekretario di estado Alexandra Van Huffelen di Relashon den Reino i representante di entidat públiko Saba i Sint Eustatius a yega na palabrashon tokante esaki riba djárason 14 di sèptèmber.

Taskforce voor aanpak knelpunten

“Durante mi bishita na Hulanda Karibense mi a tende di hopi hende kon sumamente difísil ta ku por ehèmpel no tin un notario disponibel. Òf ku no tin muchu eskoho pa loke ta trata banko i asta paga ku tarheta di banko ta hopi kompliká tin bia. Ta problema pa kua mester haña un solushon. E ta hasi bida difísil i ta stroba un bon desaroyo ekonómiko”, sekretario di estado Van Huffelen ta bisa.

Esei ta e meta tambe di e ‘taskforce’: solushoná puntonan di atenshon ku ta stroba mas desaroyo ekonómiko duradero.

Diputado na entidat públiko Saba: “E temanan ku e taskforce ta traha riba dje ta puntonan di atenshon di basta aña ku nos, komo gobièrnu insular i asosiashon empresarial di Saba, ta pidi atenshon p’e. No semper ku e resultado deseá. Pa e motibu aki, esaki ta un momentu importante awor ku e puntonan aki ta risibí atenshon di tur ministerio embolbí. Akseso na servisio bankario òf algu simpel manera haña un kódigo postal, tin bia ta kita for di bista riba agènda polítiko na Den Haag. Pa nos isla ku ainda ta den desaroyo, e ta esensial. Pa e motibu aki mi ta kontentu ku a establesé e akuerdonan tokante di e taskforce ofisialmente.”

Komisario di Gobièrnu interino di entidat públiko Sint Eustatius Claudia Toet: “Resientemente a inisiá ku servisio notarial bèk na Sint Eustatius i Saba. Nos ta hopi kontentu ku e servisio aki ku ta nesesario pa e islanan. Nos ta bai traha bon huntu den e taskforce pa garantisá servisio duradero na e islanan riba término largu. Ku esei nos ta wak tur e servisionan ku ta krusial pa desaroyo di Sint Eustatius.”

E problemanan ku e taskforce ta bai atendé, hopi bia ta kompliká i ta rekerí un aserkamentu konhunto di parti di tur partido embolbí. Pa e motibu ei a skohe pa forma e taskforce konhunto aki ku pa fin di aña mester produsí un plan di aserkamentu.

Entidat públiko Boneiru ta partisipá den e taskforce akí komo ‘miembro di agènda’ i di e forma ei ta embolbí den e inisiativanan di e taskforce.