Koninklijke Marechaussee ta topa estranheronan sin estadia legal
Den wikènt di 17 pa 18 di sèptèmber Koninklijke Marechaussee (KMar) a topa vários estranhero ku di forma ilegal ta keda na Boneiru. Riba djasabra 17 di sèptèmber a topa ku tres persona indokumentá, probablemente di Repúblika Dominikana. I riba djadumingu a topa ku tres persona den besindario di Sorobon, di kua un persona tabata disponé di un pasaporte di Ecuador. E persona aki no tabatin un status di estadia na Boneiru.
Riba djasabra 17 di sèptèmber den oranan trempan di mainta, KMar a haña un notifikashon di un situashon sospechoso kaminda a topa ku tres persona den besindario di Laguna Beach. Den koperashon ku Kuerpo Polisial di Hulanda Karibense (KPCN), KMar a atendé ku e notifikashon aki. A investigá e situashon i kontrolá si yudansa médiko ta nesesario. Bou di e sirkunstansianan e tres personanan tabata di bon salú. Ora a resultá ku e tres personanan aki – probablemente di desendensia Dominikano - no por a indiká bon na unda i kon nan a subi tera, KMar a bai ofisina ku nan pa mas investigashon. Entre tantu a trasladá e personanan indokumentá pa Instituto Hudisial Hulanda Karibense (JICN). Durante e proseso di investigashon mas profundo, nan ta keda detené einan.
Riba djadumingu 18 di sèptèmber durante un patruya, empleadonan di KMar a bolbe topa ku tres persona den besindario di Sorobon. Na e momentu ei e tres personanan aki tabata landa den un área kaminda esaki no ta permití. Durante kòntròl di e tres personanan aki, a resultá ku un di nan no tabata disponé di un pèrmit di estadia. A trasladá e hòmber ku tabata disponé di un pasaporte di Ecuador, tambe pa JICN, kaminda e ta keda en espera di su deportashon.
Koninklijke Marechaussee ta supervisá seguridat na fronteranan di Hulanda Karibense, tantu na aeropuerto komo riba awanan teritorial di e islanan. Dor di kombatí traspaso ilegal di frontera i kriminalidat ku ta pasa fronteranan, KMar ta kontribuí na e seguridat riba e islanan.