Miónes èkstra pa mehorá forsa di kompra na Hulanda Karibense
Den 2023 gabinete ta pone 16 mion euro disponibel pa mehorá forsa di kompra pa abitantenan di Boneiru, Sint Eustatius i Saba. Den 2024 despues ta pone 12 mion euro èkstra disponibel i for di 2024 4 mion euro pa aña. E plaka ta forma parti di e medidanan amplio ku ta tuma pa mehorá forsa di kompra na Hulanda.
E fortifikashon di forsa di kompra aki ta bin riba e medionan finansiero èkstra di 30 mion euro struktural (23 mion euro den 2022) di den e Akuerdo di Koalishon pa mehorá nivel di bida di abitantenan di Hulanda Karibense. I ta un komplementashon riba e 5 mion euro ku gabinete a pone na disposishon na mart último pa redusí akseins i introdusí un kompensashon energétiko pa kas di famia ku un entrada abou den 2022.
Ta usa e montante èkstra ku gabinete ta pone na disposishon awor pa por pone e kompensashon energétiko disponibel den 2023 tambe. Ta trata di un suma di 1300 dòler pa kas di famia te 130% di e suèldu mínimo legal. Tambe ta prolongá e redukshon di akseins riba gasolin den 2023: 16 USD sèn pa liter pa e promé mitar di 2023 i 8 USD sèn pa liter pa e di dos mitar di 2023.
Ademas grandinan ta risibí un penshun básiko mas haltu den 2023. E oumentu di e AOV ta korespondé ku e suma ku originalmente tabata deseá pa 2025. Esaki ta nifiká ku un persona ku tin derechi riba AOV i ku tin AOV kompleto akumulá, dependiendo di unda e ta biba na Hulanda Karibense, ta risibí pa luna alrededor di 150 dòler èkstra.
Mas aleu mayornan ta risibí otro aña mas kompensashon pa yu i akohida di mucha ta bira mas barata. Esaki ta nifiká pa un mama soltero ku 2 yu di por ehèmpel 1 i 3 aña, ku e ta risibí 40 dòler èkstra na kompensashon pa yu i ta paga 50 dòler ménos na akohida di mucha (den kaso di akohida kompleto).
Tambe ta hisa e suma liber di impuesto. Esaki ta parti di e entrada pa kua no mester paga belasting. E oumentu di e suma liber di impuesto na Hulanda Karibense ku 500 dòler ta kondusí na un redukshon di gastu di 30,4% x USD 500 = alrededor di 150 dòler riba base anual pa abitantenan di Hulanda Karibense ku ta paga impuesto di suèldu òf entrada.
E medidanan di forsa di kompra ta bin èkstra riba e korekshon di inflashon ku ta apliká generalmente entrante 1 di yanüari riba e suèldu mínimo legal, e AOV, e AWW, e ònderstant i e kompensashon pa yu (komo tambe e suma liber di impuesto). Ta stipulá altura di e korekshon di inflashon basá riba e índise di preis di konsumidó di CBS pa e di tres kuartal di 2022. Ta publiká e porsentahe akí den kareda di 20 di òktober. E porsentahe di inflashon pa e di dos kuartal 2022 tabata alrededor di 8 pa 9%, pero ta difísil pa pronostiká kon desaroyo di esaki lo ta pa fin di e di tres kuartal di e aña akí.
Mas aleu ta trahando tambe riba un pakete pa Hulanda Karibense pa suavisá e konsekuensianan di e preisnan energétiko ku ta oumentando.
Minister Schouten di Maneho di Pobresa ta mira ku, debí na e subida fuerte di preis di energia i alimento, siguridat di eksistensia di un grupo kresiente di hende ta mas i mas bou di preshon:
“Pa e motibu ei nos ta tuma un gran kantidat di medida pa mehorá forsa di kompra otro aña, manera un kompensashon energétiko nobo pa e entradanan abou, un penshun básiko mas haltu i pa mayornan, un kompensashon pa yu mas haltu i akohida di mucha mas barata. Ta nesesario pa e entrada- i gastunan ta mas den balanse ku otro. Gabinete kier tuma medidanan pa logra esaki mas rápido.”
Sekretario di estado Alexandra van Huffelen di Relashonnan den Reino ta kontentu ku e plaka èkstra pa habitantenan na Boneiru, Sint Eustatius i Saba:
“Ta importante pa nos yuda tur habitante di Hulanda ku medidanan di forsa di kompra èkstra. Mi ta kontentu ku pa Hulanda Karibense tambe tin un bon pakete. Pero mi sa tambe: nos no a yega ainda. Nos mester sigui traha riba kombatimentu di pobresa.”