Pasonan konkreto durante konferensia di trabou ‘Éksito di estudio pa studiantenan karibense’
Den e siman benidero lo tuma lugá e konferensia di trabou ‘Éksito di estudio pa studiantenan karibense’ na Aruba. Aruba, Hulanda Karibense, Kòrsou, Sint Maarten i Hulanda tin komo meta pa durante e konferensia aki huntu desaroyá programa ku ta sostené ku medidanan konkreto i struktural, ya asina mas studiante karibense por terminá nan estudio ku éksito. Pa por logra esaki mester pone mas atenshon na eskoho di estudio, diferensia di kultura i idioma. Ademas ta lansa un plataforma di komunikashon durante di e konferensia kaminda lo kompartí ‘best practices’.
Anualmente alrededor di 1600 studiante for di e parti karibense di Reino ta kuminsá ku un estudio na Hulanda. Durante nan estudio nan ta topa asina tantu problema, ku hopi bia nan no ta terminá nan estudio. Pa yega na un aserkamentu pa resolvé e problemanan aki, tur pais konserní ta bini huntu di 26 pa 28 di sèptèmber na Aruba. E último aña i mei a traha dirigí (online) pa prepará pa e konferensia importante aki.
Gobièrnunan i enseñansa huntu
E konferensia ta tuma lugá na Universidat di Aruba i e minister Arubano di Enseñansa i Deporte, Endy Croes, ta hasi e apertura ofisial. E ta hasi esaki huntu ku Ron Bormans, presidente di hunta direktiva i Hogeschool Rotterdam, i presidente di ‘Regiegroep Studiesucces Caribische studenten’. Sekretario general di e ministerio hulandes di Enseñansa, Kultura i Siensia, Marjan Hammersma, tambe lo tei presente. Meskos ku representantenan di e gobièrnunan di Aruba, Kòrsou, Sint Maarten, Boneiru, Sint Eustatius, Saba i Hulanda plùs rèktòrnan di kuater universidat i un representashon amplio di skol sekundario, MBO i HBO.
E partisipantenan na e konferensia ta bai atendé temanan manera un bon preparashon di studiante karibense i studiante ku ke hasi un estudio na un skol avansá, traspaso kouteloso i monitòr di studiante, oportunidat di estudio riba e islanan i mobilidat di estudio den Reino.
Plan di ehekushon pa drecha éksito di estudio
E problemanan di studiantenan karibense ta konosí pa hopi tempu kaba. Tambe e nesesidat pa traha huntu pa yega na un solushon. P’esei riba petishon di Vierlandenoverleg den 2021 a lanta e Regiegroep, ku representashon for di gobièrnu i enseñansa di e kuater paisnan. E Regiegroep a desaroyá un plan di ehekushon pa drecha e éksito di studiantenan karibense.
Un grupo di proyekto, kaminda partidonan di enseñansa di tur pais ta representá, tambe a kuminsá traha den 2021 riba e plan di ehekushon. E grupo aki lo kompartí e estado aktual, inkluso e medidanan ku ya a tuma kaba ku e partisipantenan di e kongreso.
Medidanan struktural presentá na Vierlandenoverleg
Pa sigui amplia riba loke ya a kuminsá kuné, e Regiegroep ta formulá rekomendashon konhunto pa e Vierlandenoverleg ministerial di Enseñansa, Kultura i Siensia ku ta tuma lugá den desèmber próksimo.