Sekretario di Estado di Hustisia i Seguridat ta bishitá Kòrsou, Aruba i Boneiru

Sekretario di Estado di Hustisia i Seguridat, Eric van der Burg, ta hasi un bishita di trabou di tres dia na e parti Karibense di Reino. Riba djaluna 26 i djamars 27 di sèptèmber e ta bishitá Kòrsou i Aruba i ta klousurá e programa na Boneiru riba djárason 28 di sèptèmber. Durante su bishita na e islanan Van der Burg ta hiba kombersashon ku vários kolega i partner tokante problemátika di migrashon, supervishon di frontera i e statùs aktual di esaki.

Staatssecretaris Eric van der Burg

Meta di esaki ta pa sera konosí mas mihó, siña di otro i interkambiá di eksperensia den práktika, pa asina sigui mehorá kolaborashon entre e islanan.

Van der Burg ke mira ku su propio wowo kon atmishon di estranhero i e supervishon di frontera den Reino ta reglá. Na Boneiru e Sekretario di Estado ta bishitá vários departamento, entre otro Kuerpo Polisial Hulanda Karibense (KPCN), e Instituto Hudisial Hulanda Karibense (JICN) i Koninklijke Marechaussee ku e ophetivo pa fortifiká e kolaborashon riba tereno di migrashon. Ta klousurá e bishita ku apertura ofisial di ofisina di Servisio di Imigrashon i Naturalisashon Hulanda Karibense (IND CN) na Boneiru.