Mas di 33 mion euro pa elektrisidat sostenibel pa Hulanda Karibense

Gabinete ta pone 33,6 mion euro disponibel pa un transishon aselerá pa elektrisidat sostenibel na Boneiru, Sint Eustatius i Saba. Aki un par di aña ta generá alrededor di 80 porshento di elektrisidat promedio riba e tres islanan ku energia di bientu i solo. Esei ta sòru pa preis mas abou, ménos dependensia di por ehèmpel petroli i konsiderabel ménos emishon di nitrógeno.

Duurzame elektriciteit

Energia di solo i bientu

Na Boneiru e produktor di elektrisidat Contour Global i e kompania di maneho, Bonaire Brandstof Terminals (BBT), sostené ku un supsidio, ta invertí den un parke solar i un parke di bientu. Ta bin tambe un bateria pa wanta e koriente i usá esaki na momentu ku tin ménos bientu. Ta finalisá e invershon akí na 2024/2025 i e ora ei ta generá 80 porshento di elektrisidat riba e isla ku fuentenan sostenibel. Esaki ta sòru pa preis di energia mas abou na Boneiru.

Na Saba a konstruí anteriormente dos parke solar. Saba ta investigá e posibilidat pa konstruí un kombinashon di un kampo di panel solar èkstra i un parke di bientu. Meta ta pa denter di 2 aña generá riba un dia promedio, 100 porshento di e elektrisidat di forma sostenibel. Saba Electric e ora ei mester hasi uso di e generatornan fosil solamente ora no tin sufisiente solo òf bientu.

Na Sint Eustatius, Statia Utility Company ta ampliando e parke solar i e retenshon pa medio di bateria. Di e forma ei por generá alrededor di 60 porshento di elektrisidat di forma sostenibel den 2024. Ora dal e siguiente paso pa ekspandé, ta hasi esfuerso pa logra 80% di elektrisidat duradero.

Gabinete ta sigui traha ku Boneiru, Saba i Sint Eustatius pa oumenta konserbashon aun mas tantu i limita e konsekuensianan negativo di kambio di klima (adaptashon di klima).

Minister Rob Jetten di Klima i Energia:

“Mi ta sumamente kontentu ku huntu ku e gobièrnunan di Boneiru, Saba i Sint Eustatius i e kompanianan di elektrisidat, nos por dal e paso importante akí pa logra produkshon sostenibel di elektrisidat. Di e forma akí nos ta sòru  pa un bahada signifikativo di emishon di CO2, Hulanda Karibense ta bira ménos dependiente di kombustibel fosil i asina ménos vulnerabel pa preis haltu  di energia, manera ku ta bisto na e momentunan akí. Ku esaki, Hulanda Karibense ta bira asina un showcase pa hasi otro islanan chikitu den region sostenibel.”

Sekretario di Estado Alexandra van Huffelen di Relashon den Reino ta mira den esaki un adelanto importante pa Hulanda Karibense.

“Esaki ta yuda e hendenan riba e islanan, pa motibu ku nan suministro di koriente ta keda konfiabel i nan resibu pagabel. I esei ku muchu ménos òf sin ningun emishon. Mi ta sumamente satisfecho ku gabinete ta hasi esaki posibel.”