Mini konferensia kadena di estranhero pa fortifiká kolaborashon

Pa fortifiká e koperashon dentro di e proseso di imigrashon i hasi palabrashon tokante prioridat konhunto na Hulanda Karibense, e mini konferensia anual a tuma lugá riba 29 di sèptèmber. Tema di e aña aki tabata ‘Kadena di estranhero 2.0 i trafikashon di hende’  (Vreemdelingenketen 2.0 en mensenhandel). Gezaghèber di Boneiru, Edison Rijna,  a hasi apertura di e konferensia.

Miniconferentie Vreemdelingenketen

Despues di mira bèk un ratu kòrtiku riba e konferensia di aña pasá, riba e programa di mainta a para ketu riba e tema di eksplorá posibilidat di digitalisashon i organisashon konhunto di e ‘biahe di kliente’ di un estranhero. Esaki tabata bou di guia di Ron van Beusekom, hefe di departamento di ICT na e Shared Service Organisatie di Rijksdienst Caribisch Nederland. E imágen ideal ta pa ofresé siudadano un solo portal di entrada pa servisio. Kolaborashon ta di gran importansia den esaki, pa motibu ku na Hulanda Karibense tin organisashon relativamente chikitu ku rekurso i konosementu limitá riba e área di ICT.

Parti atardi e partisipantenan a kontinuá ku e programa interaktivo ku e desaroyonan riba tereno di trafikashon di hende i kontrabanda di hende den e área di Karibe. Bou di guia di kriminólogo Simone van der Zee i liaison di polis pa Reino na Venezuela, Henk Werson, e partisipantenan a diskutí entre otro tokante kon por rekonosé señal di trafikashon di hende mas mihó dor di kolaborashon. Por ehèmpel, ora ku ta trata di hende ku ta traha ilegal aki i ku bou di preshon ta ser eksplotá.

Durante di e mini konferensia e siguiente organisashonnan tabata tin representashon: Kuerpo Polisial Hulanda Karibense (KPCN) Duana, Koninklijke Marechaussee (KMar), Ministerio Públiko (OM), Wardakosta, Instituto Hudisial Hulanda Karibense (JICN), Voogdijraad CN, Sentro di Informashon i Ekspertisio Regional (RIEC), Entidat Públiko Boneiru (entre otro Supervishon i Mantenshon i Asuntu Sivil), Plenchi di Trabou i e ministerio di Hustisia i Siguridat. E servisio di Imigrashon i Naturalisashon CN i e unidat di Asuntunan Sosial i Empleo a organisá e konferensia i tambe tabatin representashon.