Kuerpo di Bombero Hulanda Karibense (BKCN) ta organisá diferente ehersisio na Boneiru
Den e simannan benidero, Kuerpo di Bombero Hulanda Karibense (BKCN) ta organisá diferente ehersisio relashoná ku rekapasitashon. E komandantenan di Kuerpo na Saba, Sint Eustatius i Boneiru ta praktiká diferente senario na vários sitio na Boneiru.
E rekapasitashon pa e komandantenan ta dirigí riba e tareanan básiko kontra kombatimentu di kandela, kombatimentu di insidente ora ta trata di supstansia peligroso i asistensia tékniko den kaso di por ehèmpel un aksidente di outo. Komo ku mester tene kuenta ku kantidat di persona na e tres Kuerponan i e medidanan di corona vigente, ta organisá e kursonan di rekapasitashon den grupo chikitu partí den tres periodo. E ehersisionan ta tuma lugá di 17 di yanüari te ku 28 di yanüari, 2 di febrüari te ku 15 di febrüari i 21 di febrüari te ku 4 di mart.
Den e periodo aki, BKCN lo ta regularmente visibel riba kaya di Boneiru. Pa por simulá diferente senario mas mihó posibel, BKCN lo praktiká na diferente sitio inkluyendo e warda di polis bieu na Rincon, na Aeropuerto Internashonal Boneiru (BIA) i na diferente kas (bashí). Na algun di e senarionan aki huma por ta visibel, ta trata di huma simulá pa e ehersisionan aki.