Inflashon Hulanda Karibense ta subi
Den e di kuater kuartal di 2021, produkto i servisio pa konsumidó na Boneiru tabata 5,7 porshento mas karu ku e aña anterior. Den e di tres kuartal inflashon tabata ainda 4,3 porshento. Preis di koriente a subi ku 31,1 porshento i esun di awa ku 6,7 porshento kompará ku e aña anterior. Preis di gasolin a subi ku 26,6 porshento kompará ku e di kuater kuartal di 2020. Asina CBS ta informá basá riba e índise di preis di konsumidó Hulanda Karibense.
Na Sint Eustatius, preisnan a subi riba base anual ku 2,5 porshento. Den e di tres kuartal esaki tabata ainda 2,4 porshento. Na Saba inflashon a oumentá di 3,2 porshento pa 3,7 porshento den e di kuater kuartal. E oumento aki ta debí partikularmente na subida di preis di gasolin i produktonan pa mantenshon i drechamentu di kas. Gasolin na Saba tabata 27,6 porshento mas karu ku aña pasá.
Preis na Boneiru a subi ku 1,8 porshento kompará ku e kuartal anterior
Kompará ku e di tres kuartal di 2021, preis na Boneiru a subi den e di kuater kuartal ku 1,8 porshento. E oumento a ser okashoná partikularmente debí ku a para e supsidio riba e tarifa fiho pa koriente i awa entrante desèmber 2021. Esaki a kousa un subida di 9,2 porshento riba koriente i 5,6 porshento riba awa. Tambe gastu di transporte a subi ku 2,0 porshento. Gasolin a subi ku 6,2 porshento den preis i disel tabata 6,7 porshento mas karu ku e kuartal anterior. Paña i sapatu a baha ku 3,1 porshento den preis kompará ku e kuartal anterior.
Preis a subi na Sint Eustatius ku 0,6 porshento kompará ku e kuartal anterior
Preis di konsumidó na Sint Eustatius a subi den e di kuater kuartal di 2021 ku 0,6 porshento kompará ku e di tres kuartal. E kuartal anterior esei tabata ainda 1,6 porshento. Enseñansa a yuda tene e índise abou ku un bahada di 8,2 porshento, debí na bahada di preis di diferente kurso online. Gasolin a subi ku 3,7 porshento i disel ku 3,8 porshento kompará ku e di tres kuartal. Paña i sapatu a baha ku 3,5 porshento den preis kompará ku e kuartal anterior.
Preisnan a subi na Saba ku 0,6 porshento kompará ku e kuartal anterior
Na Saba e di kuater kuartal di 2021 a sali e konsumidónan un promedio di 0,6 porshento mas karu ku den e di tres kuartal. Den e di tres kuartal di 2021 e subida tabata ainda 1,7 porshento. Transporte a bira 1,3 porshento mas karu e kuartal aki kompará ku e di tres kuartal debí na subida di preis di gasolin i disel. Bibienda a bira 1,2 porshento mas karu debí na subida di preis di material di konstrukshon. Enseñansa tabatin un efekto di bahada ku un redukshon di 8,3 porshento, preis di diferente kurso online a baha. Preis di paña i sapatu a baha ku 3,5 porshento.
Sifranan tentativo
E sifranan di e di kuater kuartal di 2021 ta tentativo i lo stipulá nan definitivamente ora hasi publikashon di e promé kuartal di 2022.
Fuentenan:
StatLine: Caribisch Nederland https://opendata.cbs.nl/CBS/nl/dataset/84046NED/table?dl=BFA9