Koninklijke Marechaussee por mira bèk na seguridat di frontera durante 2021
Aunke e restrikshonnan rondó di e vírùs di corona, ainda tabatin impakto den 2021 riba e tráfiko di biahe internashonal, por bisa ku ainda frontera di Hulanda Karibense tabata hopi drùk. Den e aña ku a pasa, hopi hende a biaha pa òf for di Saba, Sint Eustatius i Boneiru. Koninklijke Marechaussee ta responsabel pa e vigilansia di frontera i ta kontrolá, entre otro kos, si personanan tin un propósito legítimo pa bini e islanan i si e personanan no a keda di mas na Hulanda Karibense.
E vigilante di frontera di Koninklijke Marechaussee ta kontrolá na frontera si personanan ta kumpli ku e kondishonnan di entrada. Por ehèmpel, ta investigá e propósito i e durashon di e biahe. Den e kaso aki ta verifiká si un biahero no tin intenshon di keda pa un periodo mas largu ku e término máksimo permití. E periodo aki ta varia segun nashonalidat i ta dependé di e propósito di biahe. Tambe, e kòntròl di entrada tin komo propósito pa evitá entrada mas tantu posibel na personanan ku intenshonnan kriminal, òf ku ta bin pa traha ilegalmente na Hulanda Karibense òf di un òf otro manera ta pone seguridat di e islanan na peliger. Na 2021, KMar a nenga entrada na 68 persona na Hulanda Karibense pasobra nan no tabata kumpli ku e kondishonnan di entrada.
Tambe, KMar ta kontrolá si un bishitante tin sufisiente rekurso finansiero pa kubri nan mes gastunan. Den e kasonan kaminda esaki no ta garantisá, por atmití un persona bou di sierto kondishonnan. E kondishon mas importante den e kaso aki ta ku un persona ku ta para garantia ta tuma e responsabilidat pa e gastunan di mantenshon di e persona aki. Tin bes ta añadí kondishonnan adishonal, manera un obligashon di mèldu. Den e último aña, 121 persona a drenta bou di kondishonnan stipulá anteriormente. E Departamento di Imigrashon di KPCN ta supervisá e kumplimentu di e atmishon bou di kondishon.
Pa personanan ku no ta habitante di Hulanda Karibense, ta verifiká tambe na salida si e bishitantenan a surpasá e periodo stipulá ku nan por keda. Infrakshon di e periodo permití ta kastigabel pa medio di un but. E montante di e but ta dependé di e kantidat di dianan ku a surpasá e periodo permití. Na 2021, Koninklijke Marechaussee a traha prosès- verbal kontra 196 persona pa motibu ku nan a surpasá e periodo máksimo permití di estadia, lokual tambe ta konosí komo 'overstay'.
Koninklijke Marechaussee ta enfatisá e importansia di un bon preparashon ora ta biaha i ta enkurashá tur hende pa hasi un bon investigashon tokante e kondishonnan di entrada vigente ora ku ta bai biaha. Bo por haña mas informashon tokante biahe pa Hulanda Karibense riba www.rijksdienstcn.com.