Poder di kompra a subi pa habitantenan di Hulanda Karibense na 2020
Poder di kompra di habitantenen di Hulanda Karibense a bolbe mehorá na 2020. Na Boneiru, e promedio di e poblashon a avansá 4,2 porshento kompará ku 2019, na Sint Eustatius i Saba esaki tabata 2,4 i 4,1 porshento. E oumento di mas fuerte tabata pa hendenan ku ta biba di un benefisio sosial i famianan ku mucha yòn. CBS ta mèldu esaki a base di sifranan nobo.
Di 2012 te ku 2017 e poder di kompra promedio na Hulanda Karibense a mehorá anualmente. Na 2018 e nivel di preis promedio na Boneiru i Saba a oumentá mas ku e entradanan na e islanan aki, dor di kua e poder di kompra a baha pa promé bia. For di 2019 a tuma algun paso pa mehorá e supsistensia, dor di kua e poder di kompra di e hendenan na e islanan a mehorá. Na 2020 a subi e kompensashon finansiero pa yu ku mas ku 30 porshento. Tambe a subi benefisionan i e suèldu mínimo legal adishonalmente. E medidanan di apoyo ku e gabinete a tuma na 2020 durante e krísis di corona a pone ku mayoria empleado por a mantené nan trabou i ku nan suèldu no a bai atras. Tambe a indemnisá empresarionan independiente pa pèrdida di entrada. Ademas, e nivel promedio di preis na tur tres isla a baha na 2020, loke tabatin un efekto positivo riba e poder di kompra.
Mas poder di kompra pa trahadónan i hende ku ta biba di benefisio sosial
E poder di kompra promedio di personanan den kas di famia ku entrada prinsipalmente for di labor a mehorá ku 3,9 porshento, tantu na Boneiru komo na Saba. Un kambio di poder di kompra promedio di 3,9 porshento ta enserá ku poder di kompra di mitar di e hendenan a mehorá ku 3,9 porshento òf mas, i e otro mitar a mehorá ku menos ku 3,9 porshento. E poder di kompra di personanan den kas di famia ku prinsipalmente entrada for di un benefisio sosial na Boneiru a mehorá mas ku tur, esta 9 porshento. Poder di kompra di ménos ku un den kada sinku persona den e kas di famia aki a bai atras.
Oumento di benefisio di poder di kompra den kas di famia ku mucha yòn
Na tur tres isla e poder di kompra promedio a mehorá pa tur tipo di kas di famia. Dor di e oumento di e kompensashon finansiero pa yu, e poder di kompra a subi espesialmente entre personanan den famianan ku yunan menor di edat. Pa hendenan den famianan konsistiendo di un mayor e oumento di mas grandi tabata na Boneiru i Saba. Esakinan a mehorá ku respektivamente 7,4 porshento i 6,1 porshento.
Benefisio di mas grandi entre hende yòn
Na tur tres isla, e poder di kompra promedio a subi den tur grupo di edat. Entre personanan den kas di famia ku un provedor di entrada prinsipal te ku 40 aña, e poder di kompra a subi ku respektivamente 5,2 porshento, 4,2 porshento i 5,9 porshento pa Boneiru, Sint Eustatius i Saba. E hendenan aki te ainda ta trahando riba nan karera profeshonal. Tambe, den e kas di famia ku nan ta forma parti di dje, sa tin mas tantu muchanan menor di edat, dor di kua nan a probechá di e oumento di kompensashon finansiero pa yu. Pa hendenan riba 60 aña e poder di kompra a oumentá entre otro dor di e oumento di e benefisionan di AOV.
6 porshento oumento di poder di kompra pa personanan ku entrada abou na Boneiru
Den tur grupo di entrada na 2020 por a papia di oumento di poder di kompra. Na Boneiru e oumento di e poder di kompra promedio di mas haltu tabata entre personanan den kas di famia den e grupo di entrada di mas abou, esta ku 6,1 porshento. Na Sint Eustatius i Saba tambe tabatin e subida di poder di kompra di mas grandi, 4,5 i 4,8 porshento, den e entradanan di mas abou. Na Saba personanan den kas di famia den e grupo di entrada di mas haltu tambe a probechá, ku 4,7 porshento mas poder di kompra.
Definishonnan:
Desaroyo di poder di kompra
Desaroyo di e poder di kompra di un persona ta kalkulá komo e kambio den porsentahe di aña pa aña di e entrada standardisá disponibel pa kada kas ahustá pa e kambio di preis. Ta klasifiká e kambionan den porsentahe aki di abou pa haltu i e balor medial – sea e balor promedio òf e balor medial – e ora ei ta ekspresá e kambio den poder di kompra di e (sup)poblashon relevante. E poder di kompra (dinámiko) por kambia pa vários motibu. E entrada ta kambia por ehèmpel dor di un oumento di salario, promoshon, aseptá (otro) trabou i bahamentu ku penshun. Kambionan di komposishon di e kas di famia, un yu ta bai for di kas, parehanan ta separá) ta kondonsí na un kambio di entrada. Den e desaroyo dinámiko di poder di kompra ta tene kuenta ku tur e kambionan aki. Poder di kompra pa 2020 ta kalkulá den relashon ku e mesun grupo di persona na 2019.
Mehorashon siguridat di supsistensia
Na 2020 e Ministerio di Asuntunan Sosial i Empleo (SZW) a oumentá e suèldunan mínimo i e Ònderstant, AOV i AWW riba e indeksashon anual ku respektivamente 5, 2 i 5 porshento èkstra na Boneiru, Sint Eustatius i Saba. Ademas a introdusí un suplemento di entrada pa derechohabientenan di AOV ku ta biba di forma independiente i a subi e Ònderstant pa personanan inkapasitá kompletamente i permanentemente. A kanselá e supsidio adishonal pa inkapasidat laboral pa Saba. A subi e kompensashon pa yu ku mas ku 30 porshento, te ku sumanan di respektivamente 83, 85 i 84 dòler pa kada yu pa luna pa Boneiru, Sint Eustatius i Saba.
Medidanan di sosten corona
Durante e pandemia di corona na 2020, e gabinete a introdusí un areglo di supsidio pa gastu salarial (dunadónan di trabou) i pèrdida di entrada (trahadó riba su mes) pa limitá e konsekuensianan finansiero di e krísis di corona mas tantu posibel.
Gruponan di entrada
Pa kada persona a kalkulá e entrada disponibel promedio standardisá di e kas di famia pa 2019 i 2020. A basa klasifikashon di e gruponan di entrada di ‘kwartiel’ riba e promedionan aki pa 2019 i 2020. Asina ta hasi un korekshon pa regreshon pa e promedio. Ta determiná e gruponan di ingreso pa kada isla.
Fuentenan:
StatLine – Koopkrachtontwikkeling http://opendata.cbs.nl/statline/#/CBS/nl/dataset/83551NED/table?dl=36C1A StatLine – Inkomen tot ijkpunt voor sociaal minimum http://opendata.cbs.nl/statline/#/CBS/nl/dataset/84786NED/table?dl=542EF
StatLine - Inkomen van particuliere huishoudens http://opendata.cbs.nl/statline/#/CBS/nl/dataset/83364NED/table?dl=2BFC1
StatLine – Inkomen van personen http://opendata.cbs.nl/statline/#/CBS/nl/dataset/83381NED/table?dl=3C07A
StatLine - Inkomensongelijkheid http://opendata.cbs.nl/statline/#/CBS/nl/dataset/83552NED/table?dl=6A3A1
Tabellen – Caribisch Nederland; inkomen tot ijkpunt sociaal minimum https://www.cbs.nl/nl-nl/maatwerk/2022/26/caribisch-nederland-inkomen-tot-ijkpunt-sociaal minimum
Lenk relevante:
Privacy – Privacyregehttps://www.cbs.nl/nl-nl/over-ons/organisatie/privacy