Inflashon Hulanda Karibense ta sigui subi

Notisia | 21-07-2022 | 17:47

Na Sint Eustatius inflashon a subi di 4,9 porshento den e promé trimèster pa 7,7 porshento den e di dos trimèster. Partikularmente e oumento di preis pa alimentashon, gasolin, i buelo, a provoká e oumento di inflashon na Sint Eustatius. Preisnan na Saba a subi ku 8,2 porshento, basá riba un periodo di un aña, den e di dos trimèster di 2022. Den e promé trimèster inflashon ainda tabata 6,7 porshento. Ta atribuí e oumento na Saba tambe na e oumento di preis di alimentashon, gasolin i buelo.

Preis na Boneiru a oumentá ku 1,8 porshento kompará ku e trimèster anterior

Kompará ku e promé trimèster di 2022, preis na Boneiru a subi den e di dos trimèster ku 1,8 porshento. E oumento aki ta debí, prinsipalmente, na e oumento di preis pa alimentashon (2,2 porshento). E preisnan di buelo a subi ku 8,5 porshento, produkto pa mantenshon di kas a subi ku 5,5 porshento i preis di seguro a subi 4,8 porshento. Preisnan di enseñansa a subi ku 7,0 porshento.

Preis na Sint Eustatius a oumenta ku 3,6 porshento kompará ku e trimèster anterior

Preis pa konsumidó na Sint Eustatius a subi den e di dos trimèster di 2022 ku 3,6 porshento kompará ku e promé trimèster. Preis pa alimentashon a subi ku 2,8 porshento den e último trimèster kompará ku e trimèster anterior. Preis di transporte a subi ku 12,4 porshento den e di dos trimèster. E oumento aki ta debí na e subida den preis di outo (4,6 porshento), gasolin (13,1 porshento) i buelo (14,8 porshento). Preis di mueble i aparato elektróniko tambe a subi.

Preis na Saba a oumentá ku 2,8 porshento kompará ku e trimèster anterior

Na Saba, konsumidó mester a paga un promedio di 2,8 porshento mas den di dos trimèster di 2022 kompará ku e trimèster anterior.

Preis pa alimentashon a subi ku 3 porshento den e último trimèster kompará ku e trimèster anterior. Na Saba, preis di transporte a subi ku 10,6 porshento den e di dos trimèster. Preis di outo tabata 4,6 porshento mas karu i e preis di gasolin a subi ku 7,4 porshento. Buelo tabata 11,2 porshento mas karu ku e trimèster anterior.

Webu a bira hopi mas karu

Hopi remarkabel ta e oumento den preis di webu den e último trimèster. Preis di webu a subi konsiderablemente riba tur tres isla kompará ku e promé trimèster. Na Sint Eustatius, webu a bira 51,7 porshento mas karu, na Saba 28,1 porshento mas karu i na Boneiru 16,3 porshento mas karu. Riba 17 di Mei 2022, entidat públiko di Boneiru a subi e preis di webu lokal pa komersio chikí.