Mas sèn pa Sint Eustatius

Sekretario di estado Alexandra van Huffelen i Komisario di Gobièrnu Sentral Alida Francis di Sint Eustatius a firma e Afsprakenakkoord Sint Eustatius 2022-2023 riba djamars 14 di yüni. Den e Afsprakenakkoord Sint Eustatius 2022-2023 tin palabrashon pa mehorá bida di abitante riba e isla entre otro via di oumento di entrada mínimo i redusí gastu por ehèmpel di mantenshon di bida.

Ondertekenen Afsprakenakkoord Sint Eustatius 2022-2023

Sekretario di estado Van Huffelen: “Mi ta kontentu ku nos por a firma e palabrashonnan. Ta hopi agradabel ku nos por dal paso ku ta mehorá bida di e hendenan na Sint Eustatius.”

Komisario di Gobièrnu Sentral Alida Francis: “Ku un enorme sintimentu di gratitut mi ta mira bèk riba e esfuerso di e miembronan di Konseho Insular i gobièrnu di Hulanda. Huntu i ku empeño di hopi ámtenar patras di kortina a hasi e palabrashonnan aki posibel ku ta bon pa e hendenan di Sint Eustatius.”

For di e akuerdo di koalishon a reservá strukturalmente 30 mion adishonal pa aña pa Hulanda Karibense. E palabrashonnan ku Sint Eustatius ta kore di promé di yüli 2022 te promé di yüli 2023, di manera ku despues di elekshon pa Konseho Insular por traha huntu ku Konseho Insular i diputadonan riba un Afsprakenakkoord nobo pa 2023 i despues. 

Den e Afsprakenakkoord a inkorporá entre otro e prioridatnan konhunto di Konseho Insular i e Komisario di Gobièrnu Sentral. Algun prioridat ta por ehèmpel kombatimentu di pobresa, bibienda sosial, energia duradero i desaroyo ekonómiko. Tin 1 mion euro disponibel pa likidá retraso riba e isla i ta oumentá e ‘vrije uitkering’ ku mesun montante. Tambe a pone mas di 660.000 euro disponibel pa fortifiká e kapasidat atministrativo i di ehekushon riba e isla. 

Kontenido di e ‘Afsprakenakkoord’

Bou di e tema bienestar ta papia di oumentá entrada di e abitantenan di Hulanda Karibense strukturalmente, redusí gastu di mantenshon di bida (awa pa bebe, telekomunikashon), investigashon kon pa mehorá e oferta di kuido i kon pa modernisá e sistema di siguridat sosial. E ministerio di Asuntunan Ekonómiko i Klima ta pone por ehèmpel 4.5 mion euro disponibel pa Hulanda Karibense pa por redusí e gastunan di awa pa bebe te 2027.

Pa loke ta trata prosperidat a hasi palabrashon tokante oumento di empleo, empeño riba kolaborashon regional pa formashon profeshonal, fortifikashon di infrastruktura, mehorá servisio di notario i banko i investigashon di konekshon aéreo sostenibel. Pa hasi e kolaborashon regional den Hulanda Karibense mas sostenibel e ministerio di Edukashon, Kultura i Siensia ta pone strukturalmente 1 mion euro disponibel pa mehorá e konekshon entre edukashon i merkado laboral. Pa ku e temanan aki ta traha huntu ku e ministerio di Finansa, Hustisia i Siguridat, Asuntunan Sosial i Labor i tambe Edukashon, Kultura i Siensia.

E tema sirkularidat ta kontené palabrashon tokante ekspanshon di kapasidat pa suministro di energia sostenibel (i ku esaki redusí gastu di energia), desaroyo di e sektor di agrikultura sostenibel i aserkamentu stratégiko di e problemátika di animal ku ta kana lòs riba kaya. Por ehèmpel, pa e invershon den suministro di energia sostenibel na Sint Eustatius insidentalmente Ministerio di Asuntunan Ekonómiko i Klima ta pone 2.5 mion euro disponibel. Tambe tin atenshon pa desaroyo espasial: tin plan trahá pa renobá i oumentá e kantidat di bibienda sosial pa hür i protekshon di patrimonio nashonal.

Bou di e rúbrika di bon gobernashon a hasi palabrashon pa kompletá e aktualisashon di pèrmit antikuá, modernisá e proseso di aplikashon di pèrmit, fortifiká e kapasidat atministrativo i di ehekushon di e aparato gubernamental, mehorá maneho finansiero i empeño riba tereno di partisipashon di hóben. Pa esaki Asuntunan Interior ta pone 1 mion euro disponibel.

Afsprakenakkoord Sint Eustatius 2022-2023