Fondo adishonal pa Boneiru ku akuerdonan di trabou
Sekretario di estado Alexandra van Huffelen i Kolegio Ehekutivo di Boneiru riba djaweps 16 di yüni a yega na akuerdonan di trabou ku otro. E palabrashonnan ta konta te elekshon na mart 2023 i ta basá riba akuerdonan anterior. Gabinete ta pone fondo adishonal disponibel pa ehekutá e akuerdonan.
Sekretario Van Huffelen ta kontentu ku e palabrashonnan hasí: “A establesé e akuerdonan di trabou atministrativo den un kolaborashon intensivo entre Entidat Públiko i diferente departamento, ku a resultá den un bon kombinashon di akshon ku ta hasi un diferensia visibel pa abitante di Boneiru.”
Gezagheber Edison Rijna ta splika mas aleu: “Nos ta hopi satisfecho ku e aktitut aktivo i rekurso adishonal ku Reino ta empeñá. Komo isla nos no ke solamente spera riba Reino pa realisá resultado pa e abitante, pero Boneiru mas i mas ke hasi esaki independientemente. Ku e akuerdonan nobo nos ta bai sigui traha riba desaroyo duradero di Boneiru i profeshonalisá Entidat Públiko Boneiru.”
Den e akuerdonan di trabou atministrativo a inkluí programanan ku ta bini di e 30 mion euro ku gabinete via e akuerdo di koalishon strukturalmente ta pone disponibel pa Hulanda Karibense. Por ehèmpel, tin 2,2 mion euro disponibel pa kaba di traha riba retraso, 1,7 mion pa fortifiká e kapasidat di ehekushon di Entidat Públiko, 1,4 mion euro pa desaroyo di bario i 1 mion pa mediashon laboral.
Punto di lansa di tur e palabrashonnan di trabou atministrativo ta pa realisá mehorashon notabel pa e abitantenan di Boneiru. Banda di atenshon pa kapasidat atministrativo i di ehekushon, e agènda sosial (ku enfoke riba aserkamentu di pobresa) i empeño riba desaroyo espasial i ekonómiko, tambe a yega na palabrashon tokante di un biblioteka nobo i lo traha duru pa mehorá partisipashon di hóben dor di stimulá e hóbennan pa nan duna di nan mes (polítikamente) pa desaroyo di Boneiru.
E ambishon ta pa despues di elekshon, huntu ku e Kolegio Ehekutivo i Konseho Insular resien nombrá e tempu ei, yega na un akuerdo nobo pa término mas largu. E akuerdonan aktual ta den liña ku e Akuerdo Intergubernamental 2018-2022 (Bestuursakkoord 2018-2022) ku kua a logra bunita resultado. A okupá posishonnan klave dentro di Entidat Públiko Boneiru, a establesé programanan di formashon i a inisiá ku programanan di ‘twinning’ ku munisipionan na Hulanda Oropeo. A realisá e sentro di trabou (job-centrum), ta tuma medida pa mehorá akohida di mucha, renobashon di kayanan grandi ta den ful swin i ta bai amplia e oferta di bibienda sosial pa hür.
Ademas, ya tin palabrashon pa oumentá salario mínimo anualmente, ku komo meta pa realisá e referensia di mínimo sosial na 2025, tin un oumento proporshonal di ònderstant mínimo, oumento di kompensashon pa yu, empeño struktural riba redukshon di gastu pa awa pa bebe i internèt i tambe tin maneho lokal di pobresa dirigí riba entre otro asistensia riba tereno di debe i mehorashon di oportunidat riba merkado laboral.
