CBP BES ta supervisá kumplimentu ku e Lei di Protekshon di Dato Personal di BES (Wbp BES)
E Komishon di Protekshon di Datonan Personal di BES (CBP BES) ta partisipá aktivamente den supervishon i mantenshon di prosesamentu di dato personal dor di sektor públiko i privá na Hulanda Karibense.
Den kuadro di su tarea di supervishon, CBP BES a ehekutá un kontròl na Shared Service Organisatie Caribisch Nederland (SSO-CN).
E motibu pa e kontròl tabata prosesamentu di dokumento ku dato personal via e ret interno di SSO CN (H-schijf), kual ta akesibel pa kada persona ku ta traha na Rijksdienst Caribisch Nederland. CBP BES a konstatá ku e protekshon i seguridat di sierto archivo digital no tabata na òrdu. E investigashon ta enfoká riba kuater aspekto di e prosesamentu di datonan personal riba H-Schijf: ku kua koutela/adekuadamente ta prosesá dato personal (artíkulo 6 Wbp BES), kua ta e propósito di e prosesamentu (artíkulo 7 Wbp BES), kua ta e base pa e prosesamentu (artíkulo 8 Wbp BES) i finalmente: kon ta garantisá e seguridat di e datonan personal (artíkulo 13 Wbp BES).
CBP BES a tèst e resultadonan na e normanan di e Lei di Protekshon di Datonan Personal BES i a konkluí ku no a kumpli ku e normanan inkorporá den e Lei di Protekshon di Datonan personal BES. A komparti e rapòrt, inkluyendo e rekomendashonnan, ku e direktor di SSO CN. SSO CN mester tuma medida tékniko i organisatorio pa protehá i sigurá dato personal na e mihó manera posibel riba e H:schijf. CBP BES tambe ta rekomendá pa elaborá un protokòl pa asina por intervení na tempu den kaso ku tin un lèkmentu di data.
CBP BES ta positivo tokante e pasonan ku SSO CN a tuma kaba pa asina pèrkurá ku e prosesamentu di dato personal riba e H:schijf ta tuma lugá mas seif posibel. “E akshonnan no ta solamente dirigí pa krea un plataforma seif i mihó protehá, pero tambe pa enfoká riba un vishon ampliamente sostené tokante uso di e H:schijf dor di departamentonan di gobièrnu sentral na Hulanda Karibense", asina e sekretaria di CBP BES, Roëlla Pourier, a indiká. CBP BES ta konfiá ku SSO CN lo implementá tur rekomendashon den e término di tempu akordá.
Despues di un trayektoria largu di informashon i konsientisashon, CBP BES a hasi e kambio pa supervishon i mantenshon. Pa optené mas informashon tokante e prosesamentu di dato personal i e tareanan di CBP BES, bo por konsultá e wèpsait: www.cbpbes.com.