Sekretario di estado Alexandra van Huffelen ta bishitá Boneiru, Saba, Sint Eustatius i Sint Maarten
Sekretario di estado Alexandra van Huffelen di Relashon di Reino, di 16 te 21 di aprel, lo hasi un bishita di trabou na Boneiru, Saba, Sint Eustatius i Sint Maarten.
Esaki ta e promé bishita di trabou di e sekretario di estado despues di e elekshonnan di konseho insular di 15 di mart na Boneiru, Saba i Sint Eustatius. Durante su biahe e lo sera konosí pues ku konseho insular i kolegio ehekutivo nobo di e islanan. Na Sint Maarten e sekretario di estado lo topa ku e promé minister i e lo tin un konsulta tambe ku e gobernadornan di Kòrsou, Aruba i Sint Maarten.
Boneiru
E bishita di trabou di sekretario di estado Van Huffelen ta kuminsá riba 16 di aprel na Boneiru, unda e lo sera konosí ku tantu e kolegio ehekutivo komo e konseho insular nobo. Ademas tin entre otro un bishita na e Sentro Regional di Informashon i Ekspertisio (RIEC) Hulanda Karibense, Fundashon Banko di Kuminda Boneiru, Fundashon Cas Boneriano i agrikultor- i kompanianan den e sektor agrario riba agènda. E sekretario di estado tambe ta pasa na e ‘call center’ di Entidat Públiko Boneiru ku resientemente a habri su porta i ku mester mehorá e servisio na abitante. Mas aleu señora Van Huffelen ta hasi apertura di un tayer di tres dia ku ta dediká na hasi mihó uso di fondonan Oropeo.
Saba
Riba 18 di aprel e sekretario di estado ta kontinuá su biahe pa Saba, unda e lo topa ku e konseho insular i kolegio ehekutivo nobo resien instalá. Ademas, tin entre otro un enkuentro planiá ku Saba Business Association i un kombersashon di mesa rondó ku stakeholder, entre otro Saba University, hòspital i e komunidat empresarial tokante di e oportunidatnan ku digitalisashon por brinda, awor i den futuro.
Sint Eustatius
Despues di Saba e sekretario di estado ta sigui su biahe pa Sint Eustatius, unda e lo hiba kombersashon ku e kolegio ehekutivo i e konseho insular nobo. Na Sint Eustatius e mandatario lo papia ku stakeholder tokante di e reto- i posibilidatnan di digitalisashon i e lo papia ku miembronan di e tim di proyekto ‘Roaming Animals’ i doñonan di kabritu.
Sint Maarten
Sekretario di estado Van Huffelen ta sera su bishita di trabou na Sint Maarten, unda despues di un kombersashon ku promé minister Silveria Jacobs, e lo tin un konsulta ku e gobernadornan di pais Kòrsou, Aruba i Sint Maarten. Tin un konsulta planiá tambe ku e Fiskal Mayó.
Riba djabièrnè 21 di aprel sekretario di estado van Huffelen ta biaha bèk pa Hulanda.