Poblashon Hulanda Karibense a krese ku kasi 1.7 mil persona na 2022
Riba 1 di yanüari 2023, e kantidat di habitante di Hulanda Karibense tabata 29.418. Esaki ta 1.692 (6 porshento) mas ku un aña anterior. E oumento ta pa gran parti pa kuenta di Boneiru, spesialmente dor di migrashon. Tambe na Saba i na menor grado na Sint Eustatius, e kantidat di habitante a krese pa motibu di un surplus di migrashon. Esaki ta resultá for di sifranan nobo di poblashon di CBS tokante Hulanda Karibense.
Poblashon Boneiru na 2022 a krese ku mas di 1.500
Boneiru tabatin 24.090 habitante riba 1 di yanüari 2023, un kresementu di 1.517 persona (7 porshento mas) en komparashon ku un aña promé. Esaki tabata partikularmente debí na e echo ku mas hende a muda pa Boneiru kompará ku e kantidat di hende ku a bandoná Boneiru (1.413). Den un grado limitá pa motibu di kresementu natural (73), ku ta e kantidat di nasementu minus e kantidat di fayesimentu. E kantidat di hende ku a nase pafó di Hulanda Karibense a krese ku mas di 1.400. Esaki ta prinsipalmente pa motibu ku tin mas habitante nasé na Hulanda Europeo, Kòrsou, Republika Dominikana, Venezuela, Colombia i Merka.
Poblashon Sint Eustatius a krese ku 51 persona
Riba 1 di yanüari 2023, Sint Eustatius tabata konta ku 3.293 habitante, un kresementu di 51 (2 porshento mas) en komparashon ku prinsipio di 2022. Esaki ta prinsipalmente pa motibu ku mas persona a establesé riba e isla kompará ku e kantidat di persona ku a bandoná e isla, kual ta limitá. Kresementu natural a keda limitá. E kantidat di hende ku a nase pafó di Hulanda Karibense a krese ku 65. Prinsipalmente e kantiodat di habitante ku a nase na Medio- i Sur-Amerika a krese.
Poblashon Saba a krese ku 124 persona
Riba 1 di yanüari 2023, Saba tabata konta ku 2.035 habitante, 124 (6 porshento) mas ku aña promé. Mas persona a establesé nan mes riba e isla kompará ku e kantidat di persona ku a bandoná e isla (114). Kresementu natural a keda limitá. E kantidat di persona ku a nase pafó di Hulanda Karibense a krese ku 139 persona. Esaki tabata prinsipalmente personanan nasé na Canada i Merka. Na prinsipio di 2023 tabatin mas persona nasé na Asia kompará ku un aña anterior.
