Sindikato i RCN ta logra akuerdo tokante kondishonnan laboral
Djaweps 14 di desèmber 2023 sindikatonan den e konsulta di sektor (ABVO, ACOM, NAPB i STrAF) i direktor di RCN na nòmber di Minister di Asuntunan Interno i Relashonnan den Reino (BZK), a logra un resultado di negosiashon tokante kondishonnan laboral pa ámtenarnan di gobièrnu sentral na Hulanda Karibense pa un periodo di tres aña (2024 t/k 2026).
Penshun
Un tópiko importante durante e negosiashonnan tabata konstrukshon di penshun. Debí na kambio den pronóstiko, partidonan a logra yega na palabrashon ku ta pone ku entrante 2024 e prima di penshun ta bai baha. Tambe lo oumentá e konstrukshon di penshun di e último 3 añanan. Ta oumentá e límite riba kua no ta konstruí penshun na USD 55.750.
Salario i kompensashon
Banda di e medidanan di penshun tambe a logra resultado di negosiashon riba un struktura salarial ahustá (tabla salarial) i otro palabrashonnan salarial. Den e struktura salarial ahustá, kada empleado ta bai dilanti finansieramente. Na komienso di e struktura salarial esaki ta subi te na di hopi desena di porshento. E skalnan salarial mas haltu tambe ta subi, pero ménos fuerte. Kompensashonnan ta subi ku un porsentahe di 12 porshento. Ta bai implementá e palabrashonnan akí entrante promé di yanüari 2024, di manera ku empleadonan di RCN ya kaba ta sinti e efekto di e struktura salarial nobo na momentu ku paga e salario di luna di yanüari 2024.
Na febrüari 2024 empleadonan ku ta risibí salario di RCN ta risibí un pago di un solo biaha na rason di USD 750,- nèto.
Tantu riba promé di yanüari 2025 komo promé di yanüari 2026, ta oumentá e salarionan di empleadonan di RCN strukturalmente ku 1,5%. Esaki ta konta tambe pa e kompensashonnan ku segun kustumber ta oumentá ku e subida di suèldu.
Demas
Di awor padilanti e empleado ta risibí tambe un gratifikashon di hubileo ora e kumpli 35 aña i 45 aña di servisio fiel.
Konsulta ku sostenedó
E organisashonnan sindikal a konsultá ku nan sostenedónan. Esaki a kondusí na resultadonan positivo unánime.
E palabrashonnan ta drenta na vigor entrante promé di yanüari 2024, a ménos ku indiká lo kontrario.