Tarifanan máksimo pa koriente i awa di bebe 2024 Hulanda Karibense
Outoridat Konsumidó & Merkado ta fasilitá pa hasi suministro di energia mas duradero pa Hulanda Karibense.
Outoridat Konsumidó & Merkado (ACM) a stipulá e tarifanan máksimo pa elektrisidat i awa di bebe riba e islanan pa 2024. ACM ta hasi esaki anualmente i ora di hasi esei ta paga tinu si e kompanianan di produkshon tin sufisiente espasio finansiero pa invershonnan ku tin mester pa hasi produkshon di koriente i awa di bebe duradero, sin ku klientenan ta paga di mas pa esei. Esei ta importante pa protehá klientenan i pasobra riba tur e islanan tin proyektonan grandi di durabilidat planiá pa 2024 i pa despues tambe. Produkshon di energia i awa di bebe duradero na Boneiru, Saba i Sint Eustatius sigun ACM no solamente ta bon pa klima, pero tambe ta pèrkurá pa preis di energia i awa di bebe riba e islanan ta ménos dependiente di e preisnan instabil di kombustibel.
ACM ta stipulá e tarifanan máksimo aki a base di e gastunan ku produktor- i distribuidornan ta hasi, pèrkurando pa e gastunan no ta innesesariamente haltu. Preisnan di kombustibel tin un influensia importante riba altura di e tarifanan, pasobra pa produkshon di elektrisidat i awa di bebe ainda ta usa hopi kombustibel fosil. Pasobra Ministerio di Asuntunan Ekonómiko i Klima i Ministerio di Infrastruktura i Maneho di Awa ta supsidiá sierto tarifa pa elektrisidat i awa di bebe, e preisnan ku klientenan mester paga ta mas abou ku e tarifanan máksimo stipulá dor di ACM.
Boneiru
Na Boneiru, e tarifa máksimo di konsumo di elektrisidat ta subi di mas o ménos 0,35 USD/kWh pa mas o ménos 0,36 USD/kWh. E tarifa máksimo di gastu fiho di elektrisidat promedio ta subi di mas o ménos 15%, ku kua altura di e tarifa ta dependé di kon pisá e konekshon ta. Na Boneiru, ta supsidiá e tarifa di gastu fiho pa elektrisidat. Pa konsumo di un kas di famia promedio (mas o ménos 210 kWh) esaki ta nifiká, inkluso e supsidio, ku un kliente ta bai paga mas o ménos 75 USD pa luna na elektrisidat entrante promé di yanüari 2024. E márgen superior pa e tarifa di pagabon (prepaid) ta baha di mas o ménos 0,68 USD/kWh pa mas o ménos 0,64 USD/kWh. Debí na e supsidionan, aki tambe e márgen superior den práktika ta sali mas abou. E tarifa máksimo pa uso di awa di bebe ta subi di mas o ménos 3,91 USD/m3 pa mas o ménos 4,17 USD/m3. Pa un kas di famia promedio esaki ta nifiká un subida di mas o ménos 2,50 USD pa luna riba e kuenta. E tarifa máksimo di gastu fiho pa un kas di famia ta subi di 43,96 USD pa luna pa 47,14 USD pa luna. Den e montantenan aki pa awa di bebe ainda no a tene kuenta ku e supsidionan.
Saba
Na Saba, e tarifa máksimo pa uso di elektrisidat ta subi di mas o ménos 0,37 USD/kWh pa mas o ménos 0,38 USD/kWh. E tarifa máksimo pa gastu fiho pa tur kategoria di konekshon ta baha ku mas o ménos 4%. Na Saba tambe ta supsidiá e tarifa pa gastu fiho. Pa konsumo di un kas di famia promedio esaki ta nifiká, inkluso e supsidio, ku un konsumidó na Saba ta bai paga mas o ménos 80 USD pa luna na elektrisidat entrante promé di yanüari 2024.
Sint Eustatius
Na Sint Eustatius, e tarifa máksimo pa uso di elektrisidat ta subi di mas o ménos 0,37 USD/kWh pa mas o ménos 0,40 USD/kWh. E tarifa máksimo pa gastu fiho pa elektrisidat pa tur kategoria di konekshon ta baha ku mas o ménos 30%. Na Sint Eustatius tambe ta supsidiá e gastu fiho pa elektrisidat. Pa uso di un kas di famia promedio esaki ta nifiká, inkluso supsidio, ku un konsumidó lo paga mas o ménos 83 USD pa luna na elektrisidat entrante promé di yanüari 2024.
E tarifa máksimo pa uso di awa di bebe ta subi di mas o ménos 5,79 USD/m3 pa mas o ménos 8,29 USD/m3. Esaki tin di haber partikularmente ku e pèrdida dor ki lèkashi ku na 2022 tabata mas grandi ku a premirá. Pa un kas di famia promedio esaki ta nifiká un subida di mas o ménos 25 USD pa luna riba e kuenta. E tarifa máksimo di gastu fiho pa un kas di famia ta baha di 98,78 USD pa luna pa 95,39 USD pa luna. Den e sumanan aki pa awa di bebe ainda no a tene kuenta ku supsidionan.