Boneiru, Sint Eustatius i Saba ta haña BSN i akseso na gobièrnu digital
Konseho di minister, riba proposishon di sekretario di estado Van Huffelen (Relashon di Reino i Digitalisashon), a bai di akuerdo ku e proposishon di lei pa introdusí Burgerservicenummer (BSN) i hèrmèntnan pa akseso di gobièrnu digital na Boneiru, Sint Eustatius i Saba.
Meta di e lei ta pa fortalesé gobièrnu i komunidat digital na Hulanda Karibense.
Sekretario di estado Van Huffelen: “Disponé di un number úniko i personal, manera Burgerservicenummer, lo bai hasi bida na Boneiru, St. Eustatius i Saba mas fásil.”
E proposishon ta regla ku e kasi 29.000 habitantenan di Boneiru, Sint Eustatius i Saba ku ta registrá den registro sivil di e islanan, ta haña un BSN. Ku BSN habitantenan tin un number personal úniko ku kua nan por identifiká nan mes serka organisashonnan gubernamental.
Ku e proposishon ta bira legalmente posibel pa habitante- i empresarionan haña akseso na e hèrmèntnan pa akseso di gobièrnu digital na Hulanda, manera ‘DigiD’ i ‘eHerkenning’. Ku esaki habitante- i empresarionan ta mustra online ken nan ta pa regla asuntunan ku gobièrnu. E proposishon di lei ta pone asina un base importante pa ofresé servisionan gubernamental na Boneiru, Sint Eustatius i Saba gradualmente mas i mas digital i hasi nan mas aksesibel.
E proposishon akí a keda realisá den estrecho kooperashon ku gobièrnunan di Boneiru, Sint Eustatius i Saba. Di 19 di yüni te 31 di yüli siudadanonan por a reakshoná riba e proposishon pa medio di un konsulta riba internèt. Ta bai presentá e proposishon di lei awor na Raad van State pa konseho. Intenshon ta pa presentá e proposishon di lei medio 2024 na Tweede Kamer.