Mas turista ku avion pa Hulanda Karibense ku na 2021

Notisia | 29-03-2023 | 00:00

Na 2022, 173.2 mil turista a bishitá Boneiru ku avion. E aña anterior e kantidat tabata 111.3 mil. E kantidat di turista ku a bishitá e isla tabata hasta 9.8 porshento mas altu ku na 2019. Na e momento ei, 157.8 mil turista a bula bai Boneiru.

Den e di kuater kuartal di 2022, 46.8 mil turista a yega Boneiru ku avion, 6.8 porshento mas ku den e mes un kuartal di e aña anterior. Nunka promé asina tantu turista a bishita Boneiru ku avion manera den e último kuartal di aña pasá.

Mitar mas tantu turista ku avion pa Sint Eustatius den 2022

E kantidat di turista ku a bula pa Sint Eustatius na 2022, kompará ku un aña promé, a subi ku 55,6 porshento te na 5,6 mil. Di otro un banda, esaki ta 46,7 porshento ménos ku na 2019; na e momento ei, 10,5 mil turista a yega Sint Eustatius ku avion.

Den e di kuater kuartal di 2022, 1,7 mil turista a bishita Sint Eustatius ku avion, esaki ta 54,5 porshento mas ku e aña anterior. Durante 2022, e kantidat di turista ku a bishita Sint Eustatius ku avion a krese kada kuartal.

Turismo via avion na Saba ainda no ta riba e nivel promé ku corona

Tambe na Saba, e kantidat di turista ku a bishitá e isla ku avion na 2022 a subi ku 22,5 porshento te na 4,9 mil. Esaki ta ainda 44,3 porshento ménos ku na 2019. Den e último kuartal di 2022, 1,4 mil turista a bula pa e isla, esaki ta mes un kantidat ku den e mes un kuartal un aña anterior.

E porsentahe di turistanan ku nashonalidat Hulandes na Boneiru a baha

E porsentahe di turistanan ku nashonalidat Hulandes ku a bula pa Boneiru a baha di 71 porshento na 2021 pa 64 porshento un aña despues. E kantidat di turista di nashonalidat Hulandes sí a krese; for di mas òf ménos 79 mil pa 111 mil. E kaida den porsentahe tin konekshon ku un kresementu di e kantidat di bishitante for di Merka. Tambe na Sint Eustatius e porsentahe di bishitante ku nashonalidat Hulandes a baha, miéntras ku na Saba esaki a krese un tiki.

Un parti di e turistanan ku nashonalidat Hulandes ta biba na Aruba, Sint Maarten i Kòrsou. Na 2022, 10 porshento di e turistanan entrante ku a bula pa Boneiru tabata di e islanan aki. Den e aña anterior, e porsentahe aki tabata 15 porshento. E kantidat di turista prosedente di Aruba, Sint Maarten òf Kòrsou a krese sí e último aña ku 3,7 porshento, te na mas ku 17 mil.