19 mion pa stabilisashon di klep di Sint Eustatius
Gabinete tin intenshon pa pone maksimal €19 mion na disposishon di entidat públiko Sint Eustatius pa stabilisá e klep na e parti di e haf di e isla. A inkluí esaki den e asina yamá ‘Voorjaarsnota’, ku a presentá resientemente na Kamer i Tweede Kamer tin ku ratifiká esaki ainda durante tratamentu di e voorjaarsnota.
Anteriormente Gobièrnu Sentral a yuda e entidat públiko kaba finansieramente pa stet e klep bou di Fort Oranje. For di investigashon mas profundo a sali na kla sinembargo ku tin mester di medidanan pa un parti muchu mas grandi di e klep na e parti di e haf di Sint Eustatius.
Entidat públiko ta responsabel pa estado i mantenshon di e klep, pero pa motibu di e embergadura di e proyekto, den sentido finansiero tambe, na komienso di e aña akí a pidi gobièrnu sentral ofishalmente pa ayudo. Ministerio di Asuntunan Interno i Relashon di Reino ta dispuesto pa sostené Sint Eustatius den esei. Desishon riba tipo di petishonnan asina semper ta tuma lugá rònt di voorjaarsnota.
Pa garantisá ku e medidanan akí i esnan tumá anteriormente tin un efekto duradero, tin mester di medidanan adishonal pa hasi e proyekto mas sostenibel. Ta trata den e kaso ei di eliminashon di bestia di krio ku ta kana lòs i di realisashon un plan di mantenshon. Esaki ta nesesario pa evitá problema den futuro. Sekretario di estado pa Relashon di Reino i Digitalisashon, Alexandra van Huffelen, pa e motibu ei a informá kolegio ehekutivo di Sint Eustatius den un karta ku e kier hasi palabrashonnan tokante e medidanan akí, promé ku otorgá e rekursonan definitivamente.