Seshon informativo na Boneiru tokante Programa di Desaroyo Espasial pa Hulanda Karibense
Ministerio di Asuntunan Interno i Relashonnan den Reino ta kontentu pa anunsiá un seshon informativo tokante e Programa di Desaroyo Espasial pa Hulanda Karibense. E seshon informativo aki ta brinda oportunidat pa informá komunidat i instansia- òf personanan interesá tokante e maneho espasial di Reino, ku atenshon spesial riba e implikashonnan pa planifikashon espasial na Boneiru.
E seshon informativo ta inkluí un presentashon general tokante e Programa di Desaroyo Espasial pa Hulanda Karibense. E seshon lo tuma lugá riba 1 di yüni entre 2:00’or te 3:30’or di atardi. Despues di e presentashon, lo sigui un seshon di walk-in, unda tur interesado por bai den kombersashon ku representantenan di e programa pa hasi pregunta i haña informashon adishonal. E seshon aki ta tuma lugá entre 3.30’or di atardi i 7:00’or di anochi i por hasi bishita na kualkier momento.
Gustosamente nos ta invitá abitante, negoshante, grupo di interés lokal, funshonario di gobièrnu i otro interesado pa partisipá na e presentashon òf pasa serka nos durante di e sehon di walk-in. Pa mas informashon i pa registrá pa e presentashon general di 2:00’or, tuma kontakto ku: postbus.ropcn@minbzk.nl
Tokante e Programa di Desaroyo Espasial pa Hulanda Karibense
E Programa di Desaroyo Espasial pa Hulanda Karibense (ROP CN) ta un programa ku ta deskribí e metanan di maneho ku tin konsekuensia pa e planifikashon espasial na e islanan di Hulanda Karibense. E programa aki ta krea kuadronan importante pa e plan di desaroyo espasial riba e islanan. E programa ta enfoká riba diferente reto di maneho espasial manera kresementu di poblashon, sufisiente bibienda, kambio klimátiko i protekshon di kultura i naturalesa. ROP CN ta ofresé un bista general di e maneho di gobièrnu i ta proponé medidanan pa realisá un desaroyo espasial sostenibel. E ta promové diálogo strukturá entre entidat públiko i gobièrnu di Reino i ta kontribuí na un struktura di maneho integral.
| Fecha: | 1 di yüni 2023 |
| Lokashon: |
Captain Don’s Habitat, Kaya Gob. N. Debrot 103, Boneiru |
| Programa: |
2:00’or te 3:30’or di atardi: Presentashon general Programa di Desaroyo Espasial pa Hulanda Karibense 3:30’or di atardi te 7’or di anochi: Seshon di walk-in pa pregunta i kontesta |