Plannan di klima pa Boneiru, Saba i Sint Eustatius den 2024
Boneiru, Saba i Sint Eustatius ta bai traha huntu ku gabinete riba nan propio plannan pa klima. Pa esaki gabinete ta pone 1 mion euro na disposishon. E plaka ta bin riba e rekursonan ku ya ta disponibel pa adaptashon i mitigashon di klima. Kuné e islanan por kuminsá formulá e plannan, di kua e meta ta pa nan ta kla na 2024. Esaki por lesa den e reakshon di gabinete riba e rapòrt ‘Nunka no ta muchu lat’ ku a bai awe pa parlamento.
Ora di traha e plannan ta tene kuenta ku sirkunstansia lokal. Asina por ehèmpel Boneiru ta deseá pa traha riba un plan di klima via di un mesa di klima. Saba i Sint Eustatius ta preferá pa traha direktamente riba un plan, tumando na kuenta e tamaño limitá di e islanan akí. Huntu ku e islanan ta bai kuminsá ku diferente akshon. Manera por ehèmpel, embolbí abitante den e plannan di klima, formulá preguntanan di konosementu i pèrkurá pa dunamentu di bon informashon. E meta prinsipal ta pa den 2024 realisá tres plan di klima ku tin apoyo, pa e islanan na Hulanda Karibense.
E 1 mion euro pa kuminsá ku e plannan di klima, ta bin di e ministerionan di Infrastruktura i Maneho di Awa, Asuntunan Ekonómiko i Klima i Asuntunan Interno i Relashonnan den Reino. Ta stipulá e montante akí formal den e presupuesto di primavera i e ta bin adishonal riba e mas di 33 mion euro ku ya ta disponibel pa hasi produkshon di elektrisidat riba e tres islanan, mas duradero. Mas aleu gabinete a primintí pa pèrkurá pa un punto di kontakto ku ta sostené e islanan ku e koordinashon entre e diferente ministerionan embolbí. E próksimo lunanan ta bai deliberá kon ta bai konkretisá esei.
Sekretario di estado Van Huffelen:
Senarionan di klima resien ta mustra ku Boneiru, Saba i Sint Eustatius awor i den futuro ta bai haña nan mes konfrontá ku konsekuensianan di kambio di klima. Manera por ehèmpel subida di nivel di laman, tormenta pisá ku ta bai oumentá, subida di temperatura i daño na i pèrdida di refnan di koral vulnerabel. Mi koleganan Rob Jetten (Klima i Energia) i Mark Harbers (Infrastruktura i Maneho di Awa) i ami, ta deseá gustosamente di sostené e kolegionan ehekutivo di Boneiru, Saba i Sint Eustatius den nan aserkamentu di e retonan riba tereno di siguridat, salubridat, garantia di eksistensia, ekonomia i biodiversidat, ku nan ta enfrentá komo konsekuensia di kambio di klima.
A pidi señor Nijpels pa duna un konseho tokante organisashon di un mesa di klima na Boneiru i si un struktura asina ta aplikabel pa Saba i Sint Eustatius. Un próksimo gabinete lo disidí kon realisashon di e plannan di klima nobo lo bai bira i kua rekursonan adishonal ta bai pone disponibel pa Hulanda Karibense.