Boto ta pega riba ref na Sorobon
Riba djamars 14 di desèmber alrededor di 11 or di anochi, ‘meldkamer’ sentral a risibí notifikashon tokante un boto ku a pega na kosta na altura di Sorobon. E boto a bin pega riba e ref ku tin na entrada di e bahia di awa entre Sorobon i Lac. E boto ku dos hòmber abordo a sali di Kòrsou na kaminda pa Aves na momentu ku diripiente nan a haña nan den problema sùit di Boneiru.
Tur servisio di seguridat, bou di kua Koninklijke Marechaussee, Kuerpo Polisial Hulanda Karibense, Duana i Wardakosta a ranka sali pa ofresé ayudo i pa aktua di manera pa salba. Mirando e situashon di e laman i komo ku no tabatin niun otro manera pa yega na e boto, Wardakosta a disidí pa embolbí e helikòpter di Wardakosta.
Komo ku e boto tabata yenando ku awa i e helikòpter no a yega ainda, kolaboradónan di Koninklijke Marechaussee, Wardakosta i Duana a disidí pa kana den e awa plat pero tòg no por a alkansá e dos personanan. E helikòpter a asistí e hòmbernan pa asina por a hiba nan di manera seif na e bich di Sorobon.