Bishita di Minister Christianne van der Wal na e parti Karibense di Reino
Minister di Naturalesa i Nitrógeno, Christianne van der Wal, lo bishitá e parti Karibense di Reino di 3 pa 8 di òktober próksimo. For di 8 di òktober te ku 12 di òktober Direktor General pa Naturalesa i Peska Donné Slangen ta representá Minister van der Wal. E biahe ta den kuadro di e Plan di Maneho di Naturalesa i Medioambiente di Hulanda Karibense 2020-2030, e konferensia internashonal na Aruba tokante protekshon di biodiversidat den region di Karibe, i fortifikashon di kooperashon entre e paisnan di Reino.
Durante su bishita, e minister ta bishitá Boneiru i Aruba. Banda di esaki Direktor General ta bishitá Saba i Sint Eustatius. Durante su bishita, e Minister gustosamente lo ke mira kon ta pará ku naturalesa riba e islanan i lo papia ku esunnan embolbí tokante progreso i implementashon di e Plan di Maneho di Naturalesa i Medioambiente. Na Aruba e ta partisipá na e parti ministerial di e reunion di Konvenshon di Cartagena pa protekshon di Biodiversidat den e region Karibense.
Komponentenan di e programa
Aki ta sigui algun punto kulminante di e programa.
E bishita di trabou ta kuminsá na Boneiru, kaminda e minister ta bishitá e área di palu di mangel i e sitionan di reforestashon. E ta ansioso pa e bishita na Plantashi Fontein komo un bunita ehèmpel pa desaroyo di naturalesa na Boneiru.
Na Aruba e minister ta spera di firma un akuerdo di kooperashon ku e ministernan di Sint Maarten, Kòrsou i Aruba riba tereno di agrikultura, naturalesa, asuntunan veterinario i internashonal. E tres paisnan lo kompartí konosementu i kooperá entre otro den investigashon, reunion internashonal i kreashon di un Plan Nashonal di Akshon Stratégiko pa Biodiversidat pa implementashon di e palabrashon internashonal hasí durante e COP15 Biodiversidat na Montreal na desèmber 2022.
Ademas minister Van der Wal ta partisipá na e Seshon di Nivel Haltu di COP-17 di e Konvenshon di Cartagena na Aruba. E tratado akí ta enfoká riba protekshon di biodiversidat marino den region di Karibe pa medio di, por ehèmpel, indiká e áreanan protehá i espesie di mata i animal protehá. Tambe e minister lo sostené un Memorandum of Understanding (MoU) pa establesé un mekanismo di koordinashon pa promové maneho integral di oséano den e region Karibense.
Na Saba e Direktor General Slangen na nòmber di Minister ta habri e laboratorio marino (wet laboratory) pa e proyekto di restorashon di koral. E proyekto akí ta inkluí den e Plan di maneho di Naturalesa i Medioambiente i den e agènda di ehekushon di Saba. Sint Eustatius tambe lo hasi uso di e laboratorio pa ehekutá nan proyekto di restorashon di koral.
E bishita di trabou na Hulanda Karibense ta terminá ku un bishita na Sint Eustatius, kaminda entre otro ta duna atenshon na eroshon (inkluso pa medio di kabritu ku ta kana rònt liber), reforestashon i restorashon di koral.