Hulanda Karibense tin derecho riba un mínimo sosial digno
Esaki ta un komunikado di prensa di e Komishon Mínimo Sosial Hulanda Karibense
No tin òf tin apénas sufisiente plaka pa biba di un dia pa otro, nunka ta sigur di bo futuro: esei pa hopi hulandes den e munisipionan partikular Boneiru, Saba i Sint Eustatius ta algu normal. Te ku awe apénas tin un sistema sosial adekuado pa e islanan akí, manera ya pa dékadanan kaba nos ta kustumbrá kuné na e parti oropeo di Hulanda. Esei no ta kuadra ku un pais ku a ankra igualdat komo un derecho fundamental pa tur su abitantenan. E Komishon Mínimo Sosial Hulanda Karibense a investigá kon por implementá un sistema simpel i efektivo pa un mínimo sosial na e tres islanan hulandes akí. Tambe a eksplorá kiko tin mester pa logra esei.
Su konklushon ta ku aplikando un bon método presupuestario i aserkamentu sistemátiko pa kada tipo di kas di famia, por implementá un mínimo sosial ku kua por logra igual resultado ku ta e kaso na e parti oropeo di Hulanda. Pa logra esaki mester hisa entradanan mínimo konsiderablemente. Awe a entregá e rapòrt na Minister Carola Schouten pa Maneho di Pobresa, Partisipashon i Penshun i Sekretario di Estado Alexandra van Huffelen di Relashonnan den Reino i Digitalisashon.
Glenn Thodé, presidente di e Komishon ta bisa lo siguiente relashoná ku esei: “
Pobresa ta un sírkulo visioso. Na Boneiru, Sint Eustatius i Saba mas òf ménos 11.000 abitante; hóben, hende grandi, i famia ku yu, ta kai bou di e barera di pobresa. Esei ta hopi riba un poblashon di mas òf ménos 30.000 abitante. Mayoria di nan ta traha normal, pero tòg nan ta pober. Ora tin kontratempu masha lihé nan ta sak bou di e fondo di eksistensia ku tur sorto di problema sosial komo konsekuensia. Pobresa no ta normal, sigur no den un pais riku manera Hulanda ku e islanan aki ya pa diestres aña ta forma parti di dje. E último añanan e situashon ei a bira solamente pió. Esei mester kambia i e por kambia.”
Solushonnan pa un mínimo sosial digno
Nibud riba petishon di e Komishon a determiná kiko kasnan di famia na Boneiru, Sint Eustatius i Saba tin mester pa lora kuné, i pa por partisipá den komunidat. Pa esaki a hasi uso di informashon di preis di entre otro CBS i a hiba kombersashon riba kada isla ku eksperto- i abitantenan. E resultado ta un refleho realístiko di loke un kas di famia tin mester na entrada komo mínimo apsoluto. E suèldunan riba e islanan pues ta abou, pero gastunan pa nesesidatnan básiko manera bibienda, transporte, alimentashon i paña ta haltu.
E diferensia entre loke ta na vigor na e momentunan akí i loke tin mester
Un soltero na Boneiru ku ta biba den un kas di hür supsidiá, tin mester di un mínimo di 1.517 dòler pa gastunan mensual. Un soltero den ònderstant (komparabel ku ‘bijstand’) desde 1 di òktober di e aña akí tin 1.031 dòler pa luna na su disposishon. AOV pa penshonado ta 1.047 dòler. E suèldu mínimo desde e aña akí ta 1.236 dòler pa luna. Adishonalmente personanan ku entradanan mas abou na Hulanda Karibense tambe por a haña un kompensashon energétiko ekivalente na 108 dòler pa luna. Tantu esun ku ta traha komo esun ku no ta traha pa luna pues tin un falta di plaka konsiderabel. Loke ta hasi e situashon mas difísil ta e falta di kas di hür sosial di manera ku hopi hende mester hür riba e merkado di hür partikular.
Promesanan di gabinete pa e aña benidero
E komishon ta kontentu di tende ku gabinete ta reservá €30 mion otro aña pa drecha forsa di kompra di abitantenan di Boneiru, Sint Eustatius i Saba. E plaka ei entre otro ta destiná pa hisa e benefisionan sosial na Hulanda Karibense den 2024. Basá riba trabou di e Komishon por stipulá e oumentunan ei awor. Ku e rapòrt akí e Komishon ta demostrá kon esei por i kua medida mas tin mester. Komo ku e problemátika di pobresa na Hulanda Karibense ta partikularmente un problema di trahadónan pober, mester tuma medida tambe ku ta drecha nan posishon. Pensa riba oumentu di e suèldu mínimo legal, redukshon di sierto gastu i introdukshon di kompensashonnan relashoná ku entrada.
E oportunidat ku tin nos dilanti
Glenn Thodé al respekto ta bisa lo siguiente: “
E no ta kompleho òf difísil, pa motibu ku tin sufisiente espasio pa e mínimo sosial akí, manera ku nos ta demostrá den nos investigashon. Pobresa ta un falta di base pa siguridat. Si nos por pone e base ei, e oportunidat pa un mihó futuro ta presentá di mes i prosperidat lo por subi, esei ta sosodé asina na tur parti di mundu. Esei no ta solamente un asuntu di un ministerio manera Asuntunan Sosial i Empleo i Asuntunan Interno i Relashonnan den Reino, pero tin área komun tambe ku otro ministerionan, manera Finansa, Bibienda Popular, Infrastruktura i Medioambiente i Asuntunan Ekonómiko i Klima i mandatarionan di e entidatnan públiko Boneiru, Sint Eustatius i Saba. Ta trata di e boluntat konhunto pa dal paso. I finalmente no mester hasié mas kompliká ku e ta: na Hulanda Karibense ainda no tin un sistema kompleho di areglo manera nos konosé den e parti oropeo di Hulanda, pues esei ta hasi ku e solushonnan por ta simpel. I finalmente den términonan apsoluto no ta trata tampoko di un problema hopi grandi. Poblashon di e tres islanan akí no tin ni sikiera tamaño di un siudat di un provinsia hulandes promedio, pero pa e hendenan riba e islanan e ta un problema hopi grandi ku mester solushoná rápido.”
Informashon tokante e Komishon: A instituí e Komishon Mínimo Sosial Hulanda Karibense na mart di e aña akí relashoná ku un moshon di miembro di Tweede Kamer Wuite (D66). E Komishon su tarea tabata pa investigá kiko un kantidat di tipo di kas di famia tin mester pa lora kuné i pa por partisipá den komunidat na respektivamente Boneiru, Sint Eustatius i Saba. Tambe nan a analisá e sistemátika di mínimo sosial, inkluyendo posibel senarionan i kon e sistemátika por konektá mihó riba loke un kantidat di tipo di kas di famia tin mester pa por lora kuné i pa por partisipá den komunidat pa e konteksto ekonómiko mas amplio. Banda di presidente mr. dr. G.A.E. Thodé, e komishon ta konsistí di G. Berkel BSc; P.R.J. Comenencia MA, B.F. el Hage, S.A. Heilbron, C.A. Ortega-Martijn BSc, prof. mr. dr. W.L. Roozendaal i dr. A. Vliegenthart.
Dokumentonan
Rapòrt kompletu (Hulandes)
Resumen di e rapòrt Un bida digno: Un mínimo sosial ku ta provee un perspektiva pa kuida pa bo mes.
Infographic mínimo sosial (Hulandes)