Hulanda Karibense mas visibel riba mapa di Union Oropeo, representante spesial Rijna ta reportá
Representante spesial Edison Rijna a reportá na Sekretario di Estado di Relashonnan den Reino i Digitalisashon Alexandra van Huffelen di su aktividatnan desde su nombramentu riba 18 di aprel. E rapòrt ta duna un bista di e aserkamentu di e representante spesial pa Union Oropeo, Nashonnan Uní i desaroyo ekonómiko ku Latino Amérika i e region di Karibe na benefisio di Hulanda Karibense.
For di e rapòrt ta resultá ku representante spesial Rijna a tene kòmbersashonnan ku un kantidat grandi di organisashon relevante pa e desaroyo ekonómiko di Boneiru, Sint Eustatius i Saba denter i pafó di Reino – for di ministerionan te ku institutonan di Union Oropeo - pa establesé relashonnan i na mes momentu eksplorá unda tin oportunidatnan no utilisá ainda pa e islanan.
Naturalmente tambe a tene kòmbersashonnan ekstenso ku mandatarionan i Konsehonan Insular na Hulanda Karibense tokante e ophetivonan di e mishon, e prioridat- i ekspektativanan di e islanan i kon por forma mihó e koperashon mutuo. For di e kòmbersashonnan akí a konkluí ku na promé instante e mishon lo enfoká riba sinku área ku ta esensial pa Hulanda Karibense: kambio di klima, konektividat, seguridat di kuminda, fuentenan di energia duradero i diversifikashon ekonómiko.
Sekretario di Estado Van Huffelen:
"A establesé e funshon di representante spesial ku un meta opvio: kontribuí na desaroyo ekonómiko duradero di Hulanda Karibense. Kresementu duradero ta importante pa oumentá e siguridat di eksistensia di e generashonnan aktual i futuro riba e islanan. Mi ta mira e funshon di representante spesial komo un oportunidat pa representá e interesnan di Hulanda Karibense den Union Oropeo, Nashonnan Uní i e region, mas efektivamente i pa oumentá e uso di posibel fondonan dor di e islanan."
Representante spesial Rijna:
"Den mi ròndu na tur e tipo di organisashonnan, pa ami a bira mas transparente ku en general no tin sufisiente noshon di loke por hasi pa e islanan. En todo kaso, tin un falta di konosementu di e islanan i nan posishon estatal, pero tambe vice versa: kiko e islanan por nifiká por ehèmpel pa Union Europeo i e institushonnan di Union Europeo. Pa esei, un di e promé tareanan ta pa garantisá ku Hulanda Karibense ta bai resultá den forma mihó riba e mapa."