Sekretario di Estado di Hustisia i Siguridat ta bishitá Aruba, Kòrsou i Boneiru
Sekretario di Estado di Hustisia i Siguridat, Eric van der Burg, ta realisá un bishita di trabou di kuater dia na e parti karibense di Reino. For di 22 di òktober te ku 25 di òktober e ta bishitá Aruba, Kòrsou i Boneiru. Durante kombersashon ku diferente kolaboradó, organisashon i diferente bishita di trabou lo informá e sekretario di estado tokante di e maneho di migrashon, di e forma kon ta atendé ku trafikashon i kontrabanda di hende i ku maneho di frontera riba e islanan. Propósito di e bishita ta pa keda na altura di e situashon aktual i di e problemátikanan di migrashon riba e islanan.
Kolaborashon ta sentral durante su bishita na Aruba. Por ehèmpel riba tereno di implementashon di e Lei di Reino tokante Nashonalidat Hulandes, riba tereno di kolaborashon entre outoridat di frontera i pa medio ponementu di enfoke riba posibel optimalisashon den e kadena di estranhero. Tambe lo diskutí supervishon di frontera.
E bishita ta kontinuá na Kòrsou unda lo informá e sekretario di estado tokante di e maneho di migrashon i e forma kon ta atendé ku trafikashon i kontrabanda di hende. Tambe lo tene kombersashon ku organisashonnan no-gubernamental, wardakosta i Koninklijke Marechaussee.
Na Boneiru e sekretario di estado ta kuminsá su bishita ku un kombersashon ku kolaboradornan di e kadena di migrashon. Aki tambe palabrashon tokante trafikashon di hende i kontrol di frontera ta riba e programa. Ademas lo diskutí detenshon di estranhero i e sekretario di estado ta papia ku kolegio ehekutivo. Ta konkluí e bishita na e islanan ku apertura di e konferensia anual di leinan pa estranhero (vreemdelingenwetten).