Elekshon pa Tweede Kamer riba 22 di novèmber 2023
Riba djárason 22 di novèmber 2023 tin elekshon pa Tweede Kamer. Pa informá tur habitante di Boneiru, Sint Eustatius i Saba tokante e elekshon aki i e proseso di votashon, e Servisio di Reino di Hulanda Karibense (RCN) ta kuminsá ku un kampaña informativo e siman aki.
E lema di e kampaña ta: Mi ta on. Mi ta bai vota!
RCN ta ehekutá e kampaña informativo riba òrdu di e minister di Asuntunan Interno i Relashonnan den Reino. E entidatnan públiko ta responsabel pa e organisashon di e elekshon.
Residentenan di Hulanda Karibense ku nashonalidat Hulandes, ku tin 18 aña òf mas por vota. Dor di vota nan ta disidí ken lo representá nan den Tweede Kamer.
Tweede Kamer ta kontrolá gobièrnu i ta traha leinan nobo, ku tambe ta di importansia pa e habitantenan di Hulanda Karibense. Ta trata aki di temanan manera kuido, seguridat i asuntunan sosial.
Chek www.rijksdienstcn.com/elekshonpatweedekamer
òf https://www.facebook.com/TKverkiezingenCN
Mi ta on. Mi ta bai vota dia 22 di novèmber.