Bo ta brinda un mucha un man di yudansa?
Zorg en Jeugd Caribisch Nederland (ZJCN) ta buska aktivamente persona ku un kurason grandi pa apoyá mucha ku un ret sosial chikí di su mes ku nesesidat práktiko, logístiko i di akohida temporal i pa periodo duradero. Durante e luna di sèptèmber, profeshonalnan di kuido di hóben lo para tur siman riba djasabra na diferente lokalidat pa duna informashon tokante esaki i pa reklutá persona ku tin gana di bira mayor di kriansa.
Ki ora mester di yudansa?
Tin biaha mucha tin deseo pa hasi un òf otro aktividat den wikènt, pero no tin niun hende den su ret sosial ku por sosten’é den esaki. Nos ta buska persona ku por sòru pa diferente tipo di akohida, por ehèmpel den wikènt, durante fakansi di skol i pa akohida di un periodo largu òf di krísis.
E departamento di Jeugdzorg di ZJCN ta e provedor di kuido di kriansa na Hulanda Karibense i ta responsabel pa mantené seguridat duradero di kada mucha. Esaki ta enserá tambe ku un mucha mester por krese i desaroyá den un ambiente seif. ZJCN ta wak promé si un mucha por haña e sosten nesesario den e ret di famia. Algun mucha tin un ret sosial chikí i pa e motibu aki ZJCN mester buska sosten mas amplio den komunidat. Bo ke brinda un mucha un man de bes en kuando?
Drenta den akshon, brinda un mucha un man di yudansa!
E eventonan di reklutamentu ku mas informashon ta tuma lugá den tur wikènt di sèptèmber. Riba djasabra 2 di sèptèmber, por ehèmpel, e tim ta pará na Bonaire Superstore, riba 9 di sèptèmber na Van den Tweel, riba 16 di sèptèmber na e marshe na Warehouse, riba 23 di sèptèmber na Pietersz i riba djasabra 30 di sèptèmber nan ta na Rincon, Nos Zjilea, na Mangazina di Rei i na Taste of Bonaire. Pa mas informashon, manda un meil na: pleegzorg@jeugdzorgcn.com.