KMar i KPCN ta tene entrada hudisial konhunto
Pa motibu di un detenshon algun tempu pasá en konekshon ku e intenshon pa transportá kokaina pa Hulanda for di Aeropuerto Internashonal Flamingo (BIA), Koninklijke Marechaussee (KMar) a inisiá un investigashon mas aleu bou di e nòmber “Houtduif”.
Bou di guia di hues komisario un entrada hudisial en konekshon ku e investigashon aki a tuma lugá, ehekutá pa KMar den kolaborashon ku Kuerpo Polisial Hulanda Karibense (KPCN). A detené un hòmber di 44 aña di edat. A trasladá e sospechoso detené pa warda di polis pa interogashon mas aleu dor di KMar.
Durante di e entrada hudisial a konfiská entre otro un arma di kandela, un asina yamá ‘tegel’ di hash di mas o ménos 1 kilo, un asina yamá ‘duwersbol’ di kokaina di mas o ménos 350 gram i telefònnan selular. Na mes momentu un entrada hudisial a tuma lugá na Hulanda Oropeo tambe. Einan a konfiská telefònnan selular. E unidat di reshèrshi forènsiko di KPCN lo hasi investigashon mas aleu pa loke ta trata e arma di kandela i e supstansianan narkótiko. KMar i/òf e unidat di reshèrshi digital di KPCN lo skèn e telefònnan.
Koninklijke Marechaussee ta responsabel pa entre otro tareanan polisial na aeropuerto BIA i ta ehekutá investigashonnan di reshèrshi en konekshon ku insidentenan ku tuma lugá na aeropuerto. E último ta sosodé bou di guia di Ministerio Públiko BES.