Ekonomia di Boneiru a krese ku kasi 12 porshento na 2021

Notisia | 28-09-2023 | 17:46

Despues di e bahada grandi di 8.4 porshento na 2020, ekonomia di Boneiru a krese ku 11.7 porshento na 2021. Na Sint Eustatius, ekonomia a krese ku 21.1 porshento, no opstante ku turismo apénas a rekuperá despues di e krísis di korona. E kresementu a bin prinsipalmente dor di algun kompania grandi riba e isla. Na Saba, ekonomia a krese ku 3.0 porshento. CBS ta informá esaki a base di sifra nobo.

Ku e kresementu haltu na 2021, e produkto interno bruto di Boneiru, koregí pa desaroyo di preis, riba e nivel di 2019, promé ku e pandemia di korona. Esaki no ta konta pa Sint Eustatius i Saba. Na 2021, e produkto interno bruto di Sint Eustatius tabata ainda 10 porshento bou di e nivel di 2019, miéntras ku e produkto interno bruto di Saba tabata mas ku 3 porshento mas abou ku na 2019.

Kresementu na Boneiru pa motibu di rekuperashon di turismo

E kantidat di turista ku a bishitá Boneiru ku avion a subi for di 66 mil na 2020 pa 111.3 mil na 2021. Esaki a sosodé entre otro pa motibu ku tabatin ménos restrikshon di biahe. Pa e motibu aki, e balor agregá di hotèl- i restorantnan i di kultura, deporte i rekreashon (prinsipalmente kasino- i skolnan di buseo) a subi ku respektivamente 47.1 i 28.1 porshento.

Komersio tambe a benefisiá di e oumento di turismo. E balor agregá den komersio a oumentá ku 19 porshento.

Tabatin tambe mas demanda pa servisionan komersial. Asina tabatin mas demanda pa outo di hür dor di turista, pero tambe na agensia di trabou temporal, notario i ‘accountant’ a registrá un kresementu fuerte. En total, e balor agregá den servisio empresarial a oumentá ku 17,7 porshento.

E sektor di konstrukshon a kontinuá ku e kresementu fuerte di e añanan anterior. E balor agregá di kompanianan di konstrukshon a subi ku 10,2 porshento na 2021. Kompanianan di komersio, komo provedor importante pa e sektor di konstrukshon, a benefisiá tambe for di e demanda oumentá pa servisio di konstrukshon. E balor agregá den e industria a oumentá ku 15,6 porshento.

Agrikultura i eksplotashon di mineralnan ta e úniko sektor ku no a krese na 2021. Esaki a bini prinsipalmente pa motibu ku a saka ménos mineral.

Kresementu fuerte na Sint Eustatius

E kresementu fuerte di 21,1 porshento na Sint Eustatius ta debí prinsipalmente na algun kompania grandi riba e isla. Nan produkshon ta prinsipalmente enfoká riba eksportashon i ta dependé di e demanda pa zeta den e region. E demanda pa produkto- i servisionan di e kompanianan aki a baha na 2020 komo resultado di e pandemia di korona i a keda na e nivel abou ei na 2021. Di otro un banda, e balor agregá di e kompanianan aki a oumentá, ya ku nan a logra baha gastu operashonal na 2021.

Ounke e kompanianan grandi aki tin un influensia grandi riba e produkto interno bruto di Sint Eustatius, nan influensia riba e entrada nashonal ta limitá. No ta inkluí e ganashi di e kompanianan aki den e entrada nashonal. Esaki ta pa motibu ku e kompanianan aki ta pertenesé kompletamente na akshonistanan estranhero. Prinsipalmente, nan ta duna un kontribushon na entrada laboral di e isla.

Kompará ku 2017, e volúmen di e produkto interno bruto di Sint Eustatius a baha ku 38 porshento na 2021, di 142 mion pa 103 mion dòler merikano (na preisnan di 2017). Esaki tin vários motibu. Na 2018, orkan Irma a kousa daño grandi riba e isla. Na 2019, algun kompania grandi a sufri for di desaroyonan regional den e sektor di zeta, loke a baha e demanda pa almasená zeta. I na 2020, e pandemia di korona a yega, redusiendo ainda mas e demanda pa almasená zeta i e kantidat di turista ku a bishitá e isla. Na 2021, e ekonomia ainda no a bolbe na e nivel promé ku e krísis di korona, ya ku e sektornan di negoshi ku a ser afektá duru, manera hóreka i transporte, apénas a krese un tiki na 2021. Esaki prinsipalmente dor ku tabatin ménos turista ku a bishitá e isla na 2021 kompará ku 2019, e periodo promé ku korona. Den e aña ei, 10,5 mil turista a yega Sint Eustatius ku avion. Na 2021, esaki tabata 3,6 mil.

Rekuperashon leve na Saba debí na mas turismo entrante

E kantidat di turista ku a bishitá Saba via avion a subi di 2,7 mil na 2020 pa 4,0 mil na 2021, ya ku for di promé di mei 2021 Saba a bolbe duna bon bini na turistanan for di paisnan ku un riesgo abou. Esaki a resultá den un demanda mas grandi pa servisio di restorant, hotèl i taksi i pa koriente na e isla. Pa e motibu aki tambe e produkto interno bruto di Saba a subi ku 3,0 porshento na 2021. E kresementu a suavisá dor di un bahada den e balor agregá di e maneho públiko i edukashon.