A renombrá Representante di Reino interino pa Boneiru, Sint Eustatius i Saba
E konseho di minister a bai di akuerdo pa renombrá Sr. Jan Helmond MPM komo Representante di Reino interino pa e Entidatnan Públiko di Boneiru, Sint Eustatius i Saba. Sr. Helmond ta okupá e funshon aki for di novèmber 2017. E prolongashon ta drenta na vigor entrante 8 di novèmber binidero. Ta formalisá e renombramentu pa medio di un dekreto Real.
E nombramentu ta temporal, pa motibu ku den e proposishon di lei Herzieningswet WolBES i FinBES ta proponé pa kaduká e funshon di Representante di Reino (interino) i asigná e tareanan aki otro kaminda. Te na momentu ku aprobá e proposishon di lei aki i no asigná e tareanan di e Representante di Reino (interino) un otro kaminda, mester por ehekutá e tareanan legal akí.
E Representante di Reino interino ta e lenk atministrativo entre Hulanda i e Entidatnan Públiko. Den e ròl ei, entre otro, e ta responsabel pa promové bon koperashon entre e funshonarionan di gobièrnu di Reino ku ta traha na Boneiru, Saba i Sint Eustatius i e gobièrnu di e islanan. Tambe e Representante di Reino interino ta wak pa bon gobernashon. Ademas, e Representante di Reino interino tin un tarea importante manera den e área di siguridat. Asina e ta stipulá e plan di koordinashon pa desaster i krísis ku ta surpasá nivel di isla den Hulanda Karibense.