Bishita di sekretario di estado Uslu ma parti karibense di Reino

Sekretario di estado Gunay Uslu (Kultura) ta bishitá e parti karibense di Reino di 9 te ku 17 di yanüari. E biahe tin di aber ku e kolaborashon kultural, bibliotekanan i patrimonio. Tambe ta duna atenshon na e pasado di sklabitut. Uslu resientemente a anunsiá un invershon di vários mion den biblioteka- i monumentonan di Hulanda Karibense. E mandatario durante su bishita lo pasa na tur e islanan di Hulanda Karibense.

Gunay Uslu

Komponentenan di e programa

Durante su bishita sekretario di estado Uslu kier sera konosí mas tantu posibel ku kultura i patrimonio. Esakinan ta solamente algun punto kulminante di e programa. Na Sint Maarten Uslu ta partisipá na e programa ku kreadó- i bailarinnan lokal. Na Saba tin entre otro un bishita na Queen Wilhelmina Library riba programa. Na Sint Eustatius sekretario di estado Uslu ta bishitá Godet Plantation pa haña un idea di e pasado di sklabitut riba e isla.

Despues e ta sera konosí na Boneiru ku alumnonan di Bonaire School of Performing Arts. Na Kòrsou e sekretario di estado ta partisipá na e konsulta di e kuater paisnan, e asina yamá ‘vierlandenoverleg’ i e tin un enkuentro ku artistanan. Ta finalisá e biahe na Aruba, unda Uslu lo bishitá entre otro Archivo Nashonal.

Riba kada isla e tin un kombersashon ku representantenan di gobièrnu òf di e entidat públiko. Na Hulanda Karibense e sekretario di estado lo tene hiba kombersashonnan tokante introdukshon di coachnan di kultura.

Invertí den bibliotekanan i kultura

Resientemente Uslu a anunsiá un invershon di miónes den e infrastruktura kultural di Aruba, Boneiru, Kòrsou, Sint Eustatius, Saba i Sint Maarten. Asina por ehèmpel e añanan benidero lo pone tres mion euro disponibel pa fortalesé e ret di biblioteka i tin plaka  èkstra pa henter Reino pa biblioteka digital. Tambe tin dies mion euro disponibel , den forma di fiansa ku interes abou, pa mantenshon di monumentonan den e área karibense.