Bishita di trabou Minister Dijkgraaf na Kòrsou, Aruba i Boneiru
Minister Robbert Dijkgraaf (Enseñansa, Kultura i Siensia) ta bishitá Kòrsou, Aruba i Boneiru di 15 te ku 20 di yanüari. Su bishita ta den kuadro di e Ministerieel Vierlandenoverleg di Enseñansa, Kultura i Siensia i e konmemorashon di pasado di sklabitut. Minister Dijkgraaf ta minister kordinadó di e Aña di Konmemorashon di pasado di sklabitut, ku ta kuminsá riba 1 di yüli di e aña aki.
Na Kòrsou minister Dijkgraaf, huntu ku Sekretario di Estado Gunay Uslu (Kultura i Media), ta partisipá na e Ministerieel Vierlandenoverleg di Enseñansa, Kultura i Siensia ku ta tuma lugá anualmente. Tema di e konsulta aki ta e kolaborashon entre e paisnan den reino riba tereno di enseñansa i siensia. Ta papia entre otro di fortifikashon di e enseñansa Karibense i e konekshon ku enseñansa avansá. Na Kòrsou Dijkgraaf ta papia tambe ku Gobernador Lucille Andrea George-Wout i ku minister Rodolphe Samuel (Enseñansa, Kultura, Hubentut i Deporte) di Sint Maarten.
E pasado di sklabitut ta hunga un ròl importante durante e bishita. Na Kòrsou minister Dijkgraaf ta papia ku representantenan di Plataforma Sklabitut i Herensha di Sklabitut i e ta bishitá e National Archaeological Anthropological Memory Management (NAAM). Tambe e bishita na e parti wèst di Kòrsou (Bándabou) ta den kuadro di pasado di sklabitut, spesífikamente Tula, ku na 1795 a guia un rebelion kontra sklabitut riba e isla. Gobièrnu Hulandes – despues di e gobièrnu di Kòrsou – formalmente ta bai rehabilitá Tula. Na Universidat di Kòrsou minister Dijkgraaf ta papia ku studiantenan tokante konmemorashon di e pasado di sklabitut.
Banda di esei e ta bishitá e Leerhotel nobo, un kolaborashon di ROC Mondriaan, Curaçao Hospitality & Tourism Association (CHATA) i e Curaçao Tourist Board (CTB). Na e Leerhotel ta forma studiantenan na nivel di mbo di sektor di hospitality i turismo pa bira profeshonal. Na Kòrsou minister Dijkgraaf tambe ta bishitá e Caribbean Research and Management of Biodiversity (Carmabi). Esaki ta un instituto di investigashon marítimo ku ta manehá tres parke nashonal na Kòrsou.
Aruba
Na Aruba minister Dijkgraaf tin un enkuentro ku Gobernador Alfonso Boekhoudt i e ta kombersá ku minister-presidente Evelyn Wever-Croes, minister Endy Croes (Enseñansa i Deporte) i minister Xiomara Maduro (Finansa i Kultura) tokante enseñansa i pasado di sklabitut.
Na Aruba tambe e ta bishitá Colegio San Nicolas (enseñansa sekundario), instituto di edukashon Instituto Pedagogico Arubano (IPA) i e skol Mon Plaisir (enseñansa primario). Na Colegio San Nicolas e ta papia di e preparashon pa enseñansa avansá. Na IPA i Mon Plaisir e tema lo ta e kolaborashon entre estudionan di dosente i skolnan (básiko). Na e Universidat di Aruba e ta papia ku studiantenan tokante vários tópiko.
Boneiru
Na Boneiru minister Dijkgraaf ta papia ku e Kolegio Ehekutivo i ta bishitá Brede School Papa Cornes (skol pa enseñansa primario). Despues e ta sigui pa MBO Boneiru, kaminda e ta trata e temanan alokashon pa enseñansa i preparashon pa enseñansa avansá. Tambe e minister ta papia ku miembronan di e grupo di trabou 1 di yüli, entre nan representantenan di FuHiKuBo (Fundashon Históriko Kultural Boneriano). Esaki ta un organisashon Boneriano ku ta registrá historia di Boneiru. E ta bishitá i papia tambe ku algun studiante di e estudio di Idioma.
Na kaminda pa e komienso di e Aña di Konmemorashon di Pasado di Sklabitut, minister Dijkgraaf ta bishitá Sürnam i Saba, Sint Maarten i Sint Eustatius tambe durante komienso di e aña aki.