Mas bibienda pagabel na Hulanda Karibense
Minister Hugo de Jonge a manda e agènda di maneho di Bibienda i Ordenamentu Spasial Hulanda Karibense pa Tweede Kamer. E plannan ta dirigí riba stimulá konstrukshon di bibienda, redusí gastu d hür, mihó finansiamentu di propio kas i un ambiente di bibienda mihó protehá. Asina Reino huntu ku e Entidatnan Públiko ta traha na realisá bibienda pagabel i un bario habitabel.
Minister di Bibienda i Ordenamentu Spasial, Hugo de Jonge: “Pa hopi hende na Hulanda Karibense ta hopi difísil pa haña un bibienda ku ta pas ku nan entrada, fase di bida òf nan famia. E plannan konhunto aki ta bai resultá de mas kas pagabel i un ambiente di bibienda mas mihó pa e abitantenan di Hulanda Karibense.”
Drecha e base
Na e momentu aki falta informashon aktual tokante di e merkado di bibienda di Boneiru, Sint Eustatius i Saba. Pa e motibu aki ta difísil pa realisá bibienda pagabel i adekuá. P’esei ta importante pa drecha e base. E Ofisina Sentral di Statistik (CBS) ta bai atkerí informashon di entre otro e kantidat di kas eksistente, e falta di bibienda i e nesesidat pa un kas ku abitantenan tin. Banda di esei lei i reglamentu ta nesesario, pa por ehèmpel instalá un komishon di hür i realisá kompensashon di hür mas mihó. Pa e plannan aki a buta 20 mion euro disponibel.
515 kas nobo
E oferta i demanda di kas na Boneiru, Sint Eustatius i Saba ta for di balanse. Tin un nesesidat grandi pa bibienda pa persona ku un entrada abou òf mediano, pero e oferta ta limitá. Pa trese un mihó balanse entre oferta i demanda, Reino lo kontribuí finansieramente na konstrukshon di 465 kas di hür sosial na e tres islanan. Banda di esei lo konstruí 50 bibienda ku lo bende na un preis pagabel. Pa hasi mihó uso di e kasnan eksistente, lo renová 100 kas i hür sosial na Sint Eustatius. Pero, mester di mas. Na 2023 lo stipulá proyektonan di kas pa futuro entre Reino i e Entidatnan Públiko.
Stimulá bibienda pagabel
Pa motibu di skarsedat i preisnan haltu, kada bia ménos persona na Hulanda Karibense ta logra haña un kas pagabel. Asina por ehèmpel tin un parti di hürdó ku tin difikultat pa paga nan hür. Pa redusí e gastunan di bibienda di persona ku tin un entrada abou, lo aselerá konstrukshon di kasnan di hür sosial, i lo traha riba realisashon di kompensashon di hür i redukshon di gastunan di energia. Asina e islanan ta trata na kombatí pobresa di energia. Dor ku un parti di persona ku ke kumpra un kas no ta logra ku e parti finansiero, ta eksplorá medida pa mehorá e posibilidat pa finansiamentu.
Establesé plan spasial
Konstrukshon di kas ta resultá den mas tantu uso di e espasio disponibel na Hulanda Karibense. Pero tambe infrastruktura, suministro di energia, trabou, naturalesa, rekreashon i turismo ta okupá un parti kresiente di e espasio disponibel limitá na Hulanda Karibense. Pa duna direkshon na e desaroyo spasial aki, konseho di minister ta determiná un programa di desaroyo spasial na 2023. Despues Reino i e Entidatnan Públiko lo tradusí e programa aki den un plan spesífiko pa desaroyo spasia pa kada isla.