Supsidio di kriansa pa mayor di kriansa ta subi na Hulanda Karibense
E montante básiko i e supsidio pa mayor di kriansa ta subi ku 14,3 porshento na 2023. E montantenan nobo ta establesé den un reglamentu di ahuste di e Sekretario di Estado di Salubridat Públiko, Bienestar i Deporte (VWS) ku ta relashoná ku e Reglamentu Lei di Hubentut i e Reglamentu kuido di kriansa BES. E departamento Kuido i Hubentut (ZJCN) di VWS ta responsabel pa ehekushon di kuido di kriansa na Hulanda Karibense.
Ki ora kuido di kriansa ta nesesario?
Kada mucha meresé di krese den un ambiente sigur ku amor i struktura. Tin biaha tin problema den un famia i dor di esaki e mucha no por biba na kas temporalmente. E departamento di Kuido i Hubentut di ZJCN ta ofresé kuido di kriansa i ta wak promé si e mucha temporalmente por bai biba serka un otro persona ku ta konosí pa e famia. Si esaki no ta posibel, e mucha por bai serka un famia di kriansa. E forma di yudansa aki yama kuido di kriansa i ta parse e situashon di famia natural. Hopi biaha esaki ta mas mihó pa e mucha. Den un kaso asina e mayornan di kriansa ta tuma kuido pa e mucha ofer pa un periodo kòrtiku òf largu.
E subida di e supsidio pa kuido di kriansa ta bon notisia pa mayor di kriansa na Hulanda Karibense. Intenshon di e supsidio ta pa duna e mayornan di kriansa sosten finansiero den kuido i edukashon di menornan di edat ku ta biba den un famia di kriansa. Por ehèmpel ku pago di akohida despues di skol, aktividat despues di skol, paña i kuminda.
Tur aña e montantenan den e Reglamentu Lei di Hubentut i e Reglamentu kuido di kriansa BES ta subi ku e kambio den porsentahe ku tin entre e preis di konsumidó indeksá den e di tres kuartal di e aña ei i e aña anterior.
Pa informashon aktual tokante kuido di kriansa i e supsidionan, por bishitá: www.jeugdzorgcn.com.